संसदीय दलको नेता फेर्ने रेशम पक्षको निर्णयमा ‘ब्रेक’, रञ्जितानिकटका धर्मलाई सहज

रूपन्देही । नागरिक उन्मुक्ति पार्टीका संस्थापक रेशम चौधरीलाई लुम्बिनी प्रदेशमा झट्का लागेको छ । प्रदेश संसदीय दलको नेता फेरेर आफ्नो पक्षमा पार्ने निर्णय प्रदेश सभाले रोकेपछि उनलाई झट्का लागेको हो ।

नागरिक उन्मुक्ति पार्टीको तर्फबाट लुम्बिनी प्रदेश संसदीय दलको नेता फेरिएको भन्दै प्रदेश सभामा पेस भएको निवेदनलाई प्रदेश सभाले मान्यता नदिएपछि दल नेता फेर्ने निर्णय असफल भएको हो ।

प्रदेश सभाले बिहीवार उपलब्ध गराएको दलगत विवरणमा संसदीय दलको नेतामा धर्मबहादुर चौधरी नै छन् । दलगत विवरणमा राजकुमार चौधरी प्रमुख सचेतक, नरमाया ढकाल सचेतक र निर्मलादेवी थारु प्रदेश सभा सदस्य रहेकी छन् ।