वामदेव तत्काल एमालेमा नफर्किने
काठमाडौं । पार्टी एकता राष्ट्रिय अभियानका संयोजक तथा एमालेका पूर्वउपाध्यक्ष वामदेव गौतम तत्काल एमालेमा नफर्किने भएका छन् ।
सरकारले ल्याएका विभिन्न ६ अध्यादेश राष्ट्रियसभाबाट स्वीकृत गराउने कुरामा पनि गौतमले ‘विवेक प्रयोग गर्ने’ भनेका छन् । उनी राष्ट्रपतिद्वारा मनोनीत राष्ट्रियसभा सदस्य पनि हुन् ।
सोमबार नेपाल प्रेससँग कुरा गर्दै गौतमले भने, ‘सम्मानजनक एकता गरौं भन्ने मनस्थिति थियो, तर उहाँहरूले समायोजनका नाममा आत्मसमर्पण गर्न बोलाउनुभयो ।’
एमालेको सचिवालय बैठकले गौतमसँग सहकार्य गर्दै अगाडि बढ्ने निर्णय गरेपछि केही चरणमा छलफल भएको उनले बताए । तर, भूमिका र जिम्मेवारीबारे स्पष्ट जवाफ नपाएपछि एकताको सम्भावना टरेको उनले बताए ।
‘अहिलेलाई वार्ता टुट्यो’, उनले भने ।
राष्ट्रियसभामा पुगेका अध्यादेश स्वीकृत गराउने विषयमा एमालेले गौतमसहितका सांसदसँग कुरा गर्दा उनले ठोस जवाफ दिएका छैनन् । बहुमतको अभावमा अध्यादेश पारित गर्ने विषय पेचिलो बनिरहेको बेला गौतमले ‘विवेक प्रयोग गर्ने’ भनेपछि उक्त विषय अझै पेचिलो बन्ने भएको छ । नेपाल प्रेसले यसबारे प्रश्न गर्दा गौतमले भने, ‘मैले गर्ने कुरा मैं गर्छु, तपाईंहरुलाई भनेरै गर्नुपर्छ र ?’
उनले थपे, ‘अध्यादेश स्वीकृत गर्नुहुन्छ कि हुँदैन भन्ने कुरामा मैले आफ्नो विवेक प्रयोग गर्ने हो ।’
एमालेका कतिपय नेताले भदौमा आयोजना गरिने विधान अधिवेशनबाट गौतमका निम्ति उचित पद सिर्जना गरिने र त्यसपछि पार्टीमा आउन आग्रह गरिरहेको उनले सुनाए । ‘भदौपछि आउनुस्, अहिले कतै नजानुस् भनेका छन्’, एमाले नेताहरुको भनाइ सुनाउँदै उनले भने, ‘के गर्ने हो, म यसै भन्न सक्दिनँ ।’
एकताकै विषयमा नेकपा (माओवादी केन्द्र), एकीकृत समाजवादी, जसपाहरूसँग पनि बारम्बार कुराकानी भइरहेको उनले बताए । ‘कुरा त सबैसँग चलिराखेकै छ’, उनले भने ।
