संकट्टी घाटको पुल सञ्चालनको तयारी, स्थानीयमा उत्साह

टीकापुर, १९ असार । लामो समयदेखि स्थानीयवासीले देख्दै आएको दशकौ पुरानो सपना अन्ततः साकार भएको छ। संकट्टी घाटमा पुल निर्माण कार्य सफलतापूर्वक सम्पन्न भएसँगै यस क्षेत्रका बासिन्दामा खुसी र उत्साह छाएको छ।

वर्षौदेखि वर्षायाममा नदी तर्नुपर्ने बाध्यता, घण्टौसम्म जोखिमपूर्ण रूपमा वारपार गर्नुपर्ने अवस्था तथा आवतजावतमा हुने कठिनाइ अब धेरै हदसम्म अन्त्य हुने विश्वास गरिएको छ। विशेषगरी बाढीको समयमा विद्यालय जाने विद्यार्थी, बिरामी बोकेर अस्पताल पुग्नुपर्ने सर्वसाधारण तथा दैनिक व्यापार–व्यवसाय गर्ने स्थानीयले ठूलो सास्ती खेप्दै आएका थिए।

पुल सञ्चालनमा आएपछि अब सुरक्षित, सहज र नियमित आवागमन सम्भव हुने अपेक्षा गरिएको छ। यसले स्थानीय बासिन्दाको दैनिकी मात्र सहज बनाउने होइन, समग्र क्षेत्रको सामाजिक तथा आर्थिक विकासमा समेत महत्वपूर्ण योगदान पुग्ने विश्वास गरिएको छ।

स्थानीयका अनुसार यो पुल केवल दुई किनारा जोड्ने भौतिक संरचना मात्र नभई विकासको नयाँ आधारशिला हो। पुल निर्माणसँगै शिक्षा, स्वास्थ्य, कृषि, व्यापार, पर्यटन तथा अन्य पूर्वाधार विकासका सम्भावनाहरू थप विस्तार हुने अपेक्षा गरिएको छ। विद्यार्थीलाई विद्यालय पुग्न सहज हुने, बिरामीलाई समयमै स्वास्थ्य संस्था पुर्‍याउन सकिने तथा कृषकले आफ्ना उत्पादन बजारसम्म सहज रूपमा पुर्‍याउन सक्ने वातावरण सिर्जना भएको छ।

त्यसैगरी, यस क्षेत्रका धार्मिक तथा प्राकृतिक पर्यटकीय गन्तव्यसम्म पुग्न सहज पहुँच स्थापित हुने भएकाले पर्यटन प्रवर्द्धनमा समेत सकारात्मक प्रभाव पर्ने विश्वास गरिएको छ। पुलले स्थानीय उत्पादनको बजार विस्तार, रोजगारीका अवसर वृद्धि तथा आर्थिक गतिविधि चलायमान बनाउन महत्वपूर्ण भूमिका खेल्ने अपेक्षा गरिएको छ।

स्थानीयवासीहरूले पुल निर्माण कार्य सम्पन्न गराउन योगदान दिने नेपाल सरकार, सम्बन्धित निकाय, निर्माण कम्पनी, जनप्रतिनिधि तथा प्रत्यक्ष–अप्रत्यक्ष रूपमा सहयोग गर्ने सबैप्रति आभार व्यक्त गरेका छन्। उनीहरूले अब पुलको दीर्घकालीन संरक्षण, नियमित मर्मतसम्भार तथा आसपासका सडक पूर्वाधारको स्तरोन्नतिमा समेत सम्बन्धित निकायले ध्यान दिनुपर्ने आवश्यकता औल्याएका छन्।