‘प्रहरी हौँ’ भन्दै एक नेपालीलाई बन्धक बनाएर भारत लगियो
कञ्चनपुर । आफूलाई प्रहरी बताउने एक समूहले कञ्चनपुरबाट आइतबार साँझ एक नेपालीलाई बन्धक बनाएर भारत लगेको खुलेको छ । कञ्चनपुरको बेतकोट नगरपालिका–७ स्थित आफ्नो ससुरालीमा बस्दै आएका कैलालीको जानकी गाउँपालिका–६, जगतपुरका मीनबहादुर शाहलाई बन्धक बनाएर भारत पु¥याइएको हो ।
उनलाई भारत लगे पनि सीमामा प्रहरीले समेत चाल पाएन । मीनबहादुर पछिल्लो एक महिनादेखि श्रीमतीसहित कञ्चनपुरमा रहेको ससुरालीमा बस्दै आएका थिए ।
स्कुटरमा आएका दुईजनाले आफूहरु प्रहरी भएको र ‘काम छ’ भन्दै मीनबहादुरलाई लिएर गएका थिए । आफन्तले प्रहरी कार्यालयमा सम्पर्क गर्दा उनी त्यहाँ नभएको जानकारीपछि अनुसन्धान सुरु गरिएको हो ।
जिल्ला प्रहरी कार्यालय कञ्चनपुरका प्रहरी निरीक्षक (इन्सपेक्टर) लालबहादुर बमले घटनाबारे अनुसन्धान भइरहेको बताए । उनले भने, “नेपाल प्रहरीको कुनै टोलीले उनलाई लगेको होइन । उनलाई लैजाने को हुन् भन्नेबारे अनुसन्धान हुँदै छ ।”
प्रहरी अनुसन्धानका क्रममा बम कञ्चनपुरको सीमावर्ती भारतीय सहर बनबासामा प्रहरी हिरासतमा रहेको खुलेको छ । नेपाली नागरिक नेपालका सुरक्षा निकायको समन्वयबिना भारतीय प्रहरीको हात लाग्नु गम्भीर विषय भएको प्रहरीकै अधिकारीहरु बताउँछन् ।
इन्सपेक्टर बलमे मीनबहादुरलाई कुन नाकाको प्रयोग गरेर भारत पु¥याइयो भन्नेबारे पनि अनुसन्धान भइरहेको बताए ।
प्रहरीका अनुसार केही समयअघि मीनबहादुर दम्पती भारतको गुडगाउँमा बस्दै आएका थिए । उनीहरू त्यहाँ बस्दा एक घरमा लुटपाट भएको र सो लुटपाटमा मीनबहादुरको नाम समेत जोडिएकाले लगेको हुन सक्ने आशंका छ ।
