कैलालीको घोडाघोडीमा गेटा आँखा अस्पतालको उपचार केन्द्र स्थापना
सुखड । कैलालीको घोडाघोडी नगरपालिका १ सुखडमा आँखा उपचार केन्द्र स्थापना गरीएको छ । नेपाल नेत्र ज्योति संघ गेटा आँखा अस्पतालद्वारा घोडाघोडी नगरपालिका सितको सहकार्य तथा सेभा नेपालको सहयोगमामा गेटा आँखा अस्पतालको २० औँ शाखा स्थापना गरीएको हो ।
सुदूर पश्चिम प्रदेशको सबै क्षेत्रमा आँखा उपचार सेवाको पहुँच विस्तार गर्ने कार्य योजना अनुसार आँखा उपचार केन्द्र स्थापना गरीएको नेपाल नेत्र ज्योति संघ गेटा आँखाले जनाएको छ । उक्त उपचार केन्द्रमा अत्याधुनिक उपकरणहरूको प्रयोग गरी आँखा परीक्षण, औषधि उपचारको साथै सामान्य शल्यक्रिया गरिने, समुदायमा आँखा उपचार तथा जनचेतना जगाउने कार्यक्रम समेत संचालन गरिने बताईएको छ ।
आँखाको जटिल समस्या भएका बिरामीहरूलाई उपकरणमा नजडित क्यामराको मदतले टेलिमेडिसिनको प्रयोग गरी विशेषज्ञबाट आँखा परीक्षण र आवश्यक परामर्श गरी उपचार सेवा समेत प्रदान गरिने गेटा आँखा अस्पतालका चीफ मेडिकल डाइरेक्टर डा सुरेश राज पन्तले जानकारी दिए । गेटा आँखा अस्पताल बाट आँखा उपचार सेवा लिन बाट विगत लामो समय देखि वञ्चित आँखाका रोगीहरू उपचार केन्द्र बाट लाभान्वित हुने भएका छन् ।
साथै स्वास्थ्य बिमामा बीमितहरुको लागि उपचार केन्द्रबाट गेटा आँखा अस्पताल पठाई निःशुल्क आँखा परीक्षण, औषधि उपचार अप्रेसन तथा वर्षमा एक हजारसम्मको चस्मा समेत निःशुल्क उपलब्ध गराइने छ । घोडाघोडी नगरपालिका वार्ड नं. १ का अध्यक्ष मनराज शाहको सभापतित्वमा सञ्चालित उद्घाटन कार्यक्रममा प्रमुख अतिथि नगर उपप्रमुख प्रेम कुमारी थापा र विशिष्ट अतिथि सेभा नेपालका निर्देशक रामप्रसाद कँडेलबाट आँखा उपचार केन्द्रको संयुक्त रुपमा उद्घाटन गरिएको हो ।
