राप्रपा प्रवक्ता श्रेष्ठ भन्छन्- राष्ट्रप्रमुख राजा हुनुपर्छ
काठमाडौं । राष्ट्रिय प्रजातन्त्र पार्टीले राष्ट्रपतिको विषयमा पार्टीले आफ्नो धारणा ल्याउने बताएको छ ।
राष्ट्रपति निर्वाचनको विषयलाई लिएर दलहरूबीच दौडधुप चलिरहेको बेला राप्रपा प्रवक्ता मोहन श्रेष्ठले राष्ट्रप्रमुख राजा हुनुपर्ने बताएका हुन् ।
उनले फेसबुकमा लेखेका छन्, ‘हामी राप्रपा त राष्ट्रप्रमुखको रूपमा राजा हुनुपर्छ भन्ने पक्षमा निरन्तर आवाज उठाइरहेका मात्रै छैनौं दस्तावेजमै उल्लेख गरेका पार्टी हौं, के हाम्रा दलहरू आफ्नो देशको राष्ट्रप्रमुख छान्न सक्षम छैनन् वा सक्षम नभएकै हुन् ?’
उनले राष्ट्रपतिमा बाह्य हस्तक्षेपको विषयमा आइरहेको चर्चालाई लिएर दलहरूले राष्ट्रप्रमुख छान्न सक्षम नभएको भन्दै आलोचना गरेका छन् ।
उनले भनेका छन्, ‘आसन्न राष्ट्रपति निर्वाचनका सम्भावित उमेदवारमा अमुक राष्ट्रको यो रुचि र यो लबिङ छ भन्ने खालका पात्रसमेत तोकिएका समाचारले हाम्रो निर्णायकत्व कमजोर रहेको प्रत्याभूत गराउँदछ ।’
राष्ट्रपतिको निर्वाचनलाई लिएर आन्तरिक मामिलामा वैदेशिक हस्तक्षेपलाई स्वीकार गरेको मात्रै नभएर हस्तक्षेपलाई आमन्त्रण गरेको उनको भनाई छ।
‘संविधान र संवैधानिक व्यवस्थासंग सहकार्य गर्ने पार्टीको घोषित नीति छ । राष्ट्रपतिको निर्वाचनमा हाम्रो धारणा उपयुक्त समयमा सार्वजनिक गर्नेछौं’ उनले लेखेका छन् ।
राप्रपा अहिले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको सरकारमा सहभागी छ । प्रधानमन्त्री प्रचण्डले राष्ट्रपतिमा राष्ट्रिय सहमति खोज्नुपर्ने अडान राख्दैगर्दा राजाको पक्षमा वकालत गर्ने राप्रपाले के गर्छ भन्ने अझै ठोस निर्णय लिन सकेको छैन ।
