November 27, 2022

मालिका समाचार

देशकाे ऐना

महिलामाथि यौन दुव्र्यवहार गर्ने महिला जेल चलान

विज्ञापन
Tikapur sana shari khanepani tatha sarsafai sansta

के पुरुष, के महिला या तेस्रोलिंगी, पशुपन्छीलाई समेत हुन्छ यौनचाहना । तर मानव समाजमा यसलाई यति बडेमाको र बन्धित विषय बनाइएको छ कि कैयौं मानिस कुण्ठित छन् । धेरैजसो यौन अपराध यही उकुसमुकुसकै नतिजा हुन् । बलात्कार, यौन दुव्र्यवहारजस्ता घटनामा पुरुषलाई मात्रै दोषी देख्ने समाजको आम नजरिया छ । महिलालाई खासै यस्तो बात लाग्दैन । महिलाले भनेपछि निर्दाेष पुरुष पनि डामिने डरलाग्दो अवस्था विद्यमान छ । तर यसैबीच चितवनमा एउटी महिला यौन दुव्र्यवहारको कसुरअन्तर्गत जेल परेकी छन् । त्यो पनि पुरुषलाई होइन महिलाले महिलालाई नै ! ३३ वर्षीया महिलामाथि कक्षा पाँचमा पढ्ने १३ वर्षीया बालिकालाई यौन दुव्र्यवहार गरेको आरोप छ ।

गत असोज २ गते पूर्वीचितवनको रत्ननगरमा सासूले बुहारीमाथि यस्तो दोषारोपण गरेकी हुन् । वल्लो–पल्लो घरका आरोपित महिला र बालिका साथीजस्तै थिए । प्रायः सँगै हिँड्ने, बस्ने, खेल्ने गर्थे । त्यो दिन दिउँसो बालिकाका आमाबाबु मजदुरी गर्न गएका बेला महिलाको घरकोठामा बसेर खेल्दै थिए । यसैक्रममा उनले बालिकाको यौनांग छुने, चलाउने गर्दागर्दै एक्कासि उत्तेजित भई ओछ्यानमा पल्टाएर बच्चीको शरीरमा आफ्नो यौनांग दलेको अभियोग अदालतमा पेश भएको छ । त्यसो गर्दा बच्ची चिच्याएपछि सासू आमाले थाहा पाएको बताइएको छ । सासूले तत्काल छरछिमेक डाकेकी थिइन् । त्यसपछि प्रहरी नै बोलाएर बाल यौन दुव्र्यवहार मुद्दा चलाइएको हो । किशोरीका बाबुको तर्फबाट जाहेरी दिइएकोमा सासू र केही छिमेकीले पनि महिलाको विपक्षमा बयान दिएका छन् ।

विज्ञापन
विज्ञापन

बुझिएअनुसार सासूसित सम्बन्ध राम्रो थिएन । सासू–बुहारीबीच बारम्बार लडाइँ–झगडा भइरहन्थ्यो । महिलाको असामान्य हर्कतका कारण ती छिमेकी पनि आजित थिए । सकेसम्म उनलाई त्यहाँबाट पन्छाउनै पाए हुन्थ्यो भन्ने कैयौंको चाहना थियो । दिनभर बच्चाहरू लिएर हिँड्थिन्, काम गर्थिनन् । एकपटक छिमेकीको आठ बोतल रक्सी चोरेर खाइदिएकी थिइन् । रक्सीले मातेपछि जहाँ पनि सुत्ने, जे पनि बोल्ने गर्थिन् । कतिपय छिमेकी उनलाई आफ्नो दैलोमा पर्न पनि दिन्थेनन् । झगडा पर्दा सासूलाई नै जगल्टाइदिन्थिन् । डेढ वर्ष जति भयो उनी त्यो ठाउँमा बसेको । तर यसभन्दा अगाडि त्यहाँका कुनै पनि पुरुष वा महिला तथा बच्चाबच्चीमाथि उनले यसरी अनुचित यौन व्यवहार गरेको चाहिँ बुझिएन ।

जेहोस्, यो मुद्दामा गत असोज २८ गते थुनछेक बहस हुँदा १० हजार तिरेर छुट्नसक्ने आदेश भएपनि धरौटी राखेर लैजाने मान्छे नहुँदा उनी कारागारभित्रै छिन् । मुद्दा लडिदिने कोही नभएपछि अदालतकै वैतनिक वकिलले यो मुद्दा हेरेकी छन् । उनी एक्टिभ महिला नभएकी भन्दै यस्ता मान्छेलाई जेलमा थुनेर राख्नुको कुनै औचित्य नभएको र राज्यलाई फाइदा पनि नहुने जिल्ला अदालत चितवनकी वैतनिक वकिल शोभा भट्टराई बताउँछिन् । कतिपय छिमेकी पनि उनलाई थुन्नु बेकार भएको बताउँछन् । केही दिनअघि घटनास्थलमै पुगेर बुझ्दा एक जना स्थानीयले भने, ‘पागल हो के त्यो, बेकारमा लगेर थुने !’

स्थानीयका अनुसार उनका पति पनि वर्षमा ४÷५ वटी श्रीमती ल्याउने मान्छे हुन् तर कोही पनि नटिक्ने । पछिल्लो समय यिनै महिला अलि धेरै टिकेको बताइन्छ । बताइएअनुसार यसअघि महिलाको पनि अर्कै श्रीमान् थिए । सरकारी वकिलको तर्फबाट अदालतमा पेश भएको अभियोगपत्रमा महिलाले कसुर कबुल गरेको भनिएपनि अदालतमा आरोप स्वीकारेकी छैनन् । वैतनिक वकिल शोभाको भनाइमा महिलाले आफूलाई सासूले देखीनसहने र त्यो दिन बच्चाबच्चीसँग खेल्दै गर्दा नचाहिँदो आरोप लगाएको बयान अदालतमा दिएकी छिन् । महिलाको भनाइ छ, ‘सासू छुच्ची छ ।’

पीडित भनिएकी बालिकासँग बुझ्दा बालिकाको सानो भाइ पनि त्यतिबेला उनीहरूसँगै खेलिरहेका थिए । ती महिलाले आफ्नो छातीमा समातेको, माथि चढेको र आफू चिच्याएको बालिकाले बताइन् । तर, गुप्तांगमा भने नचलाएको बताउँदै त्यस समयमा आफूहरू दुवैको कपडा नखोलिएको र महिलाले स्तन समाउन कपडाभित्र हात पनि नहालेको बालिकाको भनाइ छ । यसभन्दा अगाडि महिलाले कहिल्यै त्यसो नगरेको बालिका बताउँछिन् । बालिका र घटना विवरण कागज गर्नेहरूको बकपत्र अब चुनावपछि मात्रै हुने अदालतले बताएको छ ।