गगन थापालाई प्रधानमन्त्रीमा प्रस्ताव गर्छु : महामन्त्री शर्मा
दमक, मङ्सिर १७ गते । नेपाली कांग्रेसका महामन्त्री विश्वप्रकाश शर्माले निर्वाचन परिणामले नेपाली कांग्रेस पहिलो शक्ति बनेकाले नेपाली कांग्रेसकै नेतृत्वमा सरकार बन्ने बताउनुभएको छ । उहाँले राजनीतिक परिवर्तनको एजेण्डा अब नरहेको र मूलकलाई रूपान्तरण गरेर अघि बढ्नु पर्ने दायित्व रहेकाले त्यसलाई पूरा गर्न अबको सरकार लाग्ने बताउनुभएको हो ।
राजनीतिक परिवर्तनको एजेण्डा होइन अब हाम्रो पुरै ध्यान सामाजिक रूपान्तरणको मुद्दामा केन्द्रित हुनुपर्छ र म त्यसमा केन्द्रित हुनेछु, झापाको मेचीनगरमा रोटरी क्लब अफ काँकडभिट्टाकाे कार्यक्रममा बोल्दै शर्माले भन्नुभयो । मूलक रूपान्तरणका लागि हामी सबै रूपान्तरित बन्नुपर्छ, उहाँको भनाइ थियो ।
समाज रूपान्तरणमा सामाजिक संघसंस्थाहरुको भूमिका महत्त्वपूर्ण हुनेमा जोड दिँदै समाज रूपान्तरण हुँदै गएपछि मूलक नै रूपान्तरण हुने जनाउनुभयो ।
”हामी र हाम्रो समाजलाई रूपान्तरण गर्दै लगेपछि मूलक नै रूपान्तरित हुन्छ,” शर्माले भन्नुभयो । बोलीमा भन्दा पनि व्यवहारमा रूपान्तरित हुनुपर्ने आवश्यकता रहेको उहाँको भनाइ थियो ।
झापाका क्षेत्र नं. १ बाट प्रतिनिधि सभा सदस्यमा नव निर्वाचित शर्मा केही दिन अघिदेखि गृह जिल्लामा झापामा विभिन्न कार्यक्रमहरूमा सहभागी हुँदै आउनुभएको छ । उहाँले अब प्रधानमन्त्रीमा पार्टी सभापति शेरबहादुर देउवाले विकल्प दिनेमा आफू आशावादी रहेको पनि बताउनुभएको छ ।
”मैले त यसभन्दा अघि नै बारम्बार पार्टीका अर्का महामन्त्री गगन थापालाई संसदीय दलको नेता र प्रधानमन्त्रीमा प्रस्ताव गर्छु भनेर प्रतिबद्धता गरिसकेको छु”, उहाँले भन्नुभयो ।
