विदाको दिनमै जिल्ला प्रशासनबाट सेवा पाउँदा दंग
स्याङ्जा, वैशाख २२ गते । पुतलीबजार नगरपालिका ७ का ४८ वर्षीय कृष्णप्रसाद पौडेलले विदाको दिनमा जिल्ला प्रशासन कार्यालय, स्याङ्जाबाट सेवा पाउँदा दंग पर्नुभएको छ । यस आर्थिक वर्षका विदा मध्ये १६ दिन प्रशासन कार्यालयले नागरिकता, राहदानी र राष्ट्रिय परिचयपत्रको सेवा दिने सरकारको निर्णयअनुसार पौडेलले सेवा पाउनुभएको हो ।
नागरिकता हराएपछि काठमाडौंमा व्यापार गरेर बस्ने पौडेलले प्रतिलिपि लिन विदामा पनि लिन पाएपछि चाँडै फर्कन पाएको बताउनुभयो ।
बिहीबार सिफारिस बनाउँदा दिक्क भएको बताउँदै पौडेलले शुक्रबार विदाको दिनमा नागरिकताको प्रतिलिपी र परिचयपत्रको फोटो खिचाएको बताउनुभयो ।
पौडेल मात्र होइन अर्जुन चौपारी गाउँपालिका ३ का ३० वर्षीय नविन काफ्ले नेपाली नागरिकता र राष्ट्रिय परिचयपत्रको फोटो खिचाएर विदाको दिनमा सेवा लिनुभएको छ ।
भारतको गुहावटीमा बस्ने काफ्ले नेपालमा कामले आएको बेलामा नागरिकता विदाको दिनमा झिक्ने अवसर पाएकोमा खुसी भएको बताउनुभयो ।
सरकारले विदाको दिनमा प्रशासन कार्यालयले सेवा दिन गत चैत २ गते राजपत्रमा प्रकाशन गरेको थियो ।
शुक्रबार छ जनाले वंशजको नागरिकता, दुई प्रतिलिपी र आठ जनाले राष्ट्रिय परिचयपत्रको फोटो खिचाएको प्रजिअ शशिधर घिमिरेले बताउनुभयो ।
