सुदूरपश्चिम प्रदेशसभामा आज बजेट निर्णयार्थ प्रस्तुत हुने
धनगढी । सुदूरपश्चिम प्रदेश सभाको बैठक आज बस्दैछ । सरकारले आगामी आर्थिक वर्ष ०८०/०८१ का लागि प्रस्तुत बजेटमाथि प्रदेशसभाको आज (शनिबार) को बैठकमा निर्णयार्थ पेश गर्ने कार्यसूची छ ।
बैठक अपराह्न साढे ३ बजेका लागि आह्वान गरिएको छ । सत्तारुढ दलबीच नै बजेटमा एकमत हुन नसक्दा आज बिहान ९ बजेका लागि बोलाइएको बैठक साढे ३ बजे सारेको हो ।
आजै साँझ दोस्रो बैठक पनि बस्ने छ । त्यसअघि सरकार र सत्ता साझेदार दलका नेताहरुबीच निर्णायक छलफल हुँदैछ ।
केही सांसदहरुले बोल्ने क्रममा बाँकी रहेकाले नबोलेका सांसदहरुको मन्तव्यपछि आजै बस्ने दोस्रो बैठकमा बजेटलाई निर्णयार्थ पेश गर्ने कार्यसूची रहेको प्रदेशसभा सचिवालयले जनाएको छ ।
कांग्रेसबाहेक सत्ता साझेदार माओवादी केन्द्र, नेकपा एकीकृत समाजवादी र नागरिक उन्मुक्ति पार्टीले अहिलेकै अवस्थामा बजेट पारित हुन नदिने अडान लिएका छन्।
