भूमि आयोगले ३२ जिल्लाका सुकुम्बासीको लगत संकलन गर्ने, निवेदन दिन आग्रह
काठमाडौं । राष्ट्रिय भूमि आयोगले विभिन्न जिल्लामा रहेका भूमिहीन दलित, भूमिहीन सुकुम्बासी र अव्यवस्थित बसोबासीको लगत संकलन गर्ने भएको छ ।
आयोगले ३२ जिल्लाका स्थानीय तह तोकेरै भूमिहीन दलित, भूमिहीन सुकुम्बासी र अव्यवस्थित बसोबासीलाई जग्गा प्रदान गर्ने उद्देश्यले लगत संकलन गर्न लागिएको आयोगले जनाएको छ । त्यसका लागि आयोगले आज एक सूचना जारी गर्दै ३५ दिनभित्र निवदेशन दिन भनेको छ ।
‘राष्ट्रिय भूमि आयोगले भूमिहीन दलित र भूमिहीन सुकुम्बासीलाई जग्गा उपलब्ध गराउने र अव्यवस्थित बसोबासीको व्यवस्थापन गर्ने प्रयोजनका लागि देहाय अनुसारका स्थानीय तहका भूमिहीन दलित, भूमिहीन सुकुम्बासी र अव्यवस्थित बसोबासीले जग्गा पाउन आयोगले तोकेको ढाँचाबमोजिम निवेदन फाराम भरी मिति भदौ २९ गतेबाट ३५ दिनभित्र स्थानीय तहबाट वडाका तोकिएका स्थानहरूमा खटिएका लगत सङ्कलकमार्फत पेस गर्नु हुन यो सार्वजनिक सूचना जारी गरिएको छ,’ सूचनामा भनिएको छ ।
