पेस्तोल देखाएर लुटियो पाँच लाख
सर्लाही, मङ्सिर २८ गते । सर्लाहीको हरिपूर्वामा बिहीबार बिहान अज्ञात व्यक्तिले हतियार देखाएर सहकारीका कर्मचारीको साथमा भएको पाँच लाख रुपियाँ लुटेका छन्। जिल्लाको दक्षिण-पूर्वी ग्रामीण भेगमा पर्ने हरिपूर्वा नगरपालिका–६, हनुमान चोकस्थित महाजनको पोखरी नजिक बिहीबार बिहान ११ः३० बजेतिर लुटपाट भएको हो ।
हरिपूर्वा बजारमा रहेको एनआईसी एशिया बैङ्कको शाखाबाट पाँच लाख रुपियाँ निकालेर जयगङ्गा बचत तथा ऋण सहकारी संस्थाको सेवा केन्द्र बसन्तपुरतर्फ लिएर आउँदै गर्दा हतियारधारी व्यक्तिले रकम लुटेका हुन् ।
बसन्तपुर सेवा केन्द्रका प्रमुख रामनाथ राय र कर्मचारी निरा राय ना १५ प ९८९२ नम्वरको मोटरसाइकलमा पैसा लिएर हरिपूर्वाबाट वसन्तपुरतर्फ आउँदै गर्दा अज्ञात व्यक्तिले हतियार देखाएर लुटपाट गरेका सहकारीका अध्यक्ष गणेश यादवले जानकारी दिनुभयो । तत्कालै वरिपरीका मानिसले दौडिएर नियन्त्रणमा लिन खोज्दा दुई जना हतियारधारी व्यक्ति पेस्तोलबाट एक राउण्ड हवाई फायर गर्दै फरार भएका प्रत्यक्षदर्शीले बताएका छन् ।
मुखमा कालो मास्क लगाएर हिँडेका लुटेरा सवार अपाचे मोटरसाइकलको नम्वर प्लेटमा माटोले पोतिएको थियो । सर्लाही प्रहरीका सूचना अधिकारी एवम् प्रहरी नायब उपरीक्षक (डीएसपी) दीपेन्द्र पन्जियार थारुले लुटपाटमा संलग्नहरुको खोजी तीव्र पारिएको जानकारी दिनुभयो ।
जिल्ला प्रहरी कार्यालयबाट प्रहरी निरीक्षक (इन्सपेक्टर) को नेतृत्वमा प्रहरी टोली घटनास्थलमा खटाइएको र सीमा नाकाहरुमा कडाईका साथ चेकजाँच भइरहेको डीएसपी थारुले बताउनुभयो । उहाँका अनुसार घटनाका सम्बन्धमा वरिपरीका स्थानीय र लुटिएका कर्मचारीसँग सोधपुछ भइरहेको छ ।
हरिपूर्वा बजार क्षेत्र र सडक छेउछाउमा सीसी क्यामेरा नरहेकाले प्रहरीलाई लुटेराकाे खोजी तथा पहिचानमा समस्या परेको छ ।
