छोराको भर्ना गराउन गएका अछामका मन्बिर बोहरा खोलाले बगाउँदा मृत्यु
अछाम, १२ साउन । अछामको पञ्चदेवल विनायक नगरपालिका–९ का एक पुरुषको खोलाले बगाएर मृत्यु भएको छ। मृतक स्थानीय मन्बिर बोहरा रहेको प्रहरीले जनाएको छ।
प्राप्त जानकारीअनुसार बोहरा २०८३ साउन ८ गते आफ्नो छोराको विद्यालय भर्ना गराउन कालिकोटको नरहरिनाथ गाउँपालिका–६, माल्कोट गएका थिए। सोही क्रममा लाम्रा खोलाबाट पार हुने क्रममा उनी खोलाले बगाएका थिए।
घटनापछि स्थानीय बासिन्दा, प्रहरी तथा सरोकारवाला निकायको संयुक्त टोलीले निरन्तर खोजी अभियान सञ्चालन गरेको थियो। लगातार तीन दिनसम्म खोजी गर्दा पनि उनी फेला पर्न सकेका थिएनन्।
पछि २०८३ साउन १० गते घटनास्थल नजिकै रहेको लाम्रा खोला भित्र एक ढुंगाले छेकेको अवस्था बोहराको शव फेला परेको प्रहरीले जनाएको छ। शव फेला परेपछि आवश्यक कानुनी प्रक्रिया पूरा गरी पोस्टमार्टमका लागि पठाइएको र घटनाबारे थप अनुसन्धान भइरहेको प्रहरीले जानकारी दिएको छ।
अकस्मात् भएको यस घटनाले मृतकको परिवार तथा स्थानीय समुदाय शोकमा डुबेको छ। वर्षायाममा नदी तथा खोलाको बहाव अत्यधिक हुने भएकाले आवश्यक सतर्कता अपनाउन स्थानीय प्रशासनले सर्वसाधारणलाई आग्रह गरेको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।