११ दिन पुग्न लाग्दा पनि सुरुङभित्रका टीकापुरका नागरिकको अवस्था अज्ञात

टीकापुर, २० भाद्र । रसुवाको हाकु क्षेत्रमा निर्माण भइरहेको जलविद्युत् आयोजनाको सुरुङमा फसेका टीकापुरका नागरिकको अवस्था घटना भएको ११ दिन पुग्न लाग्दा पनि अज्ञात छ। सुरुङभित्र रहेका आफ्ना आफन्तको कुनै खबर नआएपछि परिवारजन दिनहुँजसो आशा र निराशाबीच बेचैन प्रतीक्षामा छन्।

सुरुङभित्र फसेका टीकापुरका नागरिक र उनीहरूका परिवारको पछिल्लो ११ दिन यस्तै विडम्बनापूर्ण प्रतीक्षामा बितिरहेको छ। बाहिर रहेका परिवारका सदस्यहरूका लागि प्रत्येक घडी भारी बन्दै गएको छ भने सुरुङभित्रको वास्तविक अवस्था थाहा नहुँदा उनीहरूको चिन्ता झन् गहिरिँदै गएको छ।

टीकापुरका नागरिक सम्पर्कविहीन भएको सुरुङ रसुवा जिल्लाको हाकु क्षेत्रमा निर्माण भइरहेको २१६ मेगावाट क्षमताको माथिल्लो त्रिशूली–१ जलविद्युत् आयोजनाको सुरुङ रहेको बताइएको छ। प्राप्त जानकारीअनुसार नेपाली सेनाले सुरुङभित्र जमेको पानी हटाउने प्रयास गरिरहेको छ। तर सुरुङभित्र रहेका व्यक्तिहरूको अवस्था, उनीहरू कहाँ र कस्तो अवस्थामा छन् भन्ने विषयमा अझै स्पष्ट जानकारी सार्वजनिक हुन सकेको छैन।

टीकापुर नगरपालिका–१ समितिपुर, वडा नं. ५ लगायत जानकी, जोशीपुर र भजनी क्षेत्रका केही मजदुरहरू केही महिनाअघि रोजगारीका क्रममा रसुवा पुगेका थिए। स्थानीयस्तरमा पर्याप्त रोजगारीको अवसर नहुँदा परिवारको आर्थिक अवस्था सुधार्ने र केही बढी पारिश्रमिक कमाउने आशाले उनीहरू जलविद्युत् आयोजनामा काम गर्न पुगेका थिए।

तर रोजगारीको खोजीमा घरबाट टाढा पुगेका उनीहरू अहिले आफैँ अनिश्चितताको घेरामा छन्। यता घरपरिवार भने आफन्त फर्केर आउने आशामा दिन गन्दै बसिरहेका छन्।