बिचौलिया सुजन लामालाई एमाले प्रदेश कमिटीले सोध्यो ७२ घन्टे स्पष्टीकरण
पोखरा। नेकपा एमाले गण्डकी प्रदेश कमिटीले मन्त्रीसँग बिचौलियाको काम गर्ने सुजन लामालाई ७२ घन्टे स्पष्टीकरण सोधेको छ । बिहीबार लामालाई स्पष्टीकरण सोधिएको प्रदेश कमिटी अध्यक्ष नवराज शर्माले जानकारी दिए ।
सङ्घीय मामिला तथा सामान्य प्रशासन मन्त्री राजकुमार गुप्ता र भूमि व्यवस्था तथा सहकारी मन्त्री बलराम अधिकारीसँगको घुस डिलका विषयमा लामासँग लिखित जवाफ माग गरिएको अध्यक्ष शर्माले बताए ।
यसअघि सामान्य सोधपुछ गरिएको र जवाफ चित्त नबुझेपछि लिखित रूपमै स्पष्टीकरण सोधिएको शर्माको भनाइ छ । स्पष्टीकरणको समय आइतबार सकिनेछ । स्पष्टीकरण पत्र आएपछि के गर्ने भन्नेबारे निर्णय लिने अध्यक्ष शर्माले नेपाल प्रेसलाई बताए ।
केही दिनअघि सङ्घीय मामिला तथा सामान्य प्रशासन मन्त्री राजकुमार गुप्ता र भूमि व्यवस्था तथा सहकारी मन्त्री बलराम अधिकारीसँग सुजनले गरेको घुस डिलको अडिओ सार्वजनिक भएको थियो । सोही अडिओमा संलग्न भएको भन्दै गुप्ताले मन्त्री पदबाट राजीनामा दिइसकेका छन् । सुजन २०८० असोजमा भएको एमाले गण्डकी प्रदेशको अधिवेशनमा प्रदेश कमिटी सदस्यको उम्मेदवार बनेका थिए ।
एमाले जिल्ला कमिटी कास्कीले पनि सुजनको सदस्यता नवीकरण नगरी केन्द्रमा पठाएको छ ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।