किशोरीबाट गैरकानुनी रूपमा डिम्ब निकालिएको आरोप, पीडित परिवारले निष्पक्ष छानबिनको माग
काठमाडौं, १४ साउन । एक १७ वर्षीया किशोरीबाट आर्थिक प्रलोभन देखाई गैरकानुनी रूपमा डिम्ब (अण्डाणु) निकालिएको आरोप लगाउँदै पीडित परिवारले घटनाको निष्पक्ष छानबिन र संलग्नमाथि कानुनी कारबाहीको माग गरेको छ।
पीडित किशोरीकी आमाले आफ्नी छोरीलाई बाल्यकालदेखिकी साथीमार्फत “डिम्ब निकाल्दा कुनै असर पर्दैन, बरु पैसा पनि पाइन्छ” भन्दै प्रलोभनमा पारिएको दाबी गरेकी छन्। उनका अनुसार त्यसपछि किशोरीलाई बिचौलियाको सम्पर्कमा पुर्याएर ललितपुरको ग्वार्कोस्थित बी एन्ड बी अस्पताल परिसरमा रहेको आईभीएफ केन्द्रमा लगिएको थियो।
परिवारको आरोपअनुसार किशोरीलाई केही दिनसम्म औषधि तथा इन्जेक्सनमार्फत डिम्ब विकास गराइएपछि असार १४ गते नक्कली नाम र उमेर प्रयोग गरी डिम्ब निकालिएको थियो। उक्त प्रक्रियामा डाक्टर नूतन शर्मा संलग्न रहेको आरोप परिवारले लगाएको छ।
पीडित आमाले घटनापछि छोरीको स्वास्थ्य र भविष्यप्रति गम्भीर चिन्ता व्यक्त गर्दै दोषीमाथि कडा कानुनी कारबाही हुनुपर्ने माग गरेकी छन्।
यद्यपि, यस विषयमा डाक्टर नूतन शर्मा, सम्बन्धित आईभीएफ केन्द्र वा बी एन्ड बी अस्पतालको आधिकारिक प्रतिक्रिया सार्वजनिक भएको छैन। आरोपबारे सम्बन्धित निकायबाट अनुसन्धान भइरहेको भए त्यसको निष्कर्ष आउन बाँकी छ।
घटनाबारे थप तथ्य सार्वजनिक हुन बाँकी रहेकाले सम्बन्धित निकायको अनुसन्धान र आधिकारिक प्रतिवेदनपछि वास्तविक अवस्था स्पष्ट हुने अपेक्षा गरिएको छ।
