रसुवाको जलविद्युत् आयोजनाको सुरुङमा टीकापुरका ३५ कामदार फसे, उद्धारको पर्खाइमा

टीकापुर, ११ भाद्र । रसुवामा आएको विनाशकारी बाढीका कारण टीकापुरबाट रोजगारीका लागि पुगेका ३५ जना कामदार जलविद्युत् आयोजनाको सुरुङभित्र फसेका छन्। उनीहरू बाढीपछि सुरुङभित्रै थुनिएको र अहिलेसम्म उद्धार हुन नसकेको जानकारी प्राप्त भएको छ।

स्थानीय तथा परिवारका अनुसार सुरुङभित्र फसेका कामदारहरू जीवितै रहेको सूचना प्राप्त भएको छ। तर बाढीका कारण सडक, सञ्चार तथा अन्य भौतिक संरचनामा क्षति पुगेपछि उनीहरूसम्म तत्काल उद्धार टोली पुग्न कठिनाइ भइरहेको बताइएको छ।

रसुवाको २० मेगावाट क्षमताको लाङटाङ खोला जलविद्युत् आयोजनाको सुरुङमा काम गरिरहेका कामदार बाढीका कारण फसेका हुन्। आयोजनाका प्रवर्द्धकका अनुसार सुरुङ नदीको सतहभन्दा करिब १ सय मिटर माथि रहेको क्षेत्रमा छ। सार्वजनिक विवरणमा सुरुङभित्र काम गरिरहेका ३५ जना कामदारसहित आयोजनाका करिब ६० जना कर्मचारी तथा कामदार सम्पर्कविहीन रहेको उल्लेख छ।

बाढीले आयोजनाका विभिन्न संरचनामा समेत ठूलो क्षति पुर्‍याएको छ। आयोजनाको निर्माण कार्य अन्तिम चरणमा पुगेको र सुरुङमा कंक्रिटिङको काम सम्पन्न गर्न केही दिन मात्रै बाँकी रहेको अवस्थामा बाढी आएको बताइएको छ।

उद्धारका लागि परिवारको आग्रह

सुरुङभित्र आफ्ना आफन्त फसेको खबरपछि टीकापुरमा रहेका परिवारजनमा चिन्ता बढेको छ। उनीहरूलाई तत्काल सुरक्षित रूपमा बाहिर निकाल्न नेपाल सरकार, सुरक्षा निकाय, स्थानीय प्रशासन तथा सम्बन्धित जलविद्युत् आयोजनासँग परिवारले आग्रह गरेका छन्।

रसुवाको विकट भूगोल, बाढीबाट क्षतिग्रस्त सडक तथा सञ्चार संरचना र प्रतिकूल मौसमका कारण खोज तथा उद्धार कार्य चुनौतीपूर्ण बनेको छ। प्रतिकूल मौसमका कारण उद्धारका लागि परिचालन गरिएका हेलिकोप्टरसमेत पटक–पटक प्रभावित क्षेत्रमा जान नसकेको विवरण सार्वजनिक भएको छ।

सरकारले रसुवा तथा आसपासका क्षेत्रमा खोज, उद्धार र राहतलाई तीव्रता दिन नेपाली सेना, नेपाल प्रहरी तथा सशस्त्र प्रहरीसहितका सुरक्षा निकाय परिचालन गरेको जनाएको छ। उद्धारका लागि हेलिकोप्टरसमेत परिचालन गरिएको छ।

यसैबीच, सुरुङभित्र फसेका कामदारसँग सम्पर्क स्थापित गरी उनीहरूको अवस्थाबारे यकिन जानकारी लिन र तत्काल उद्धारको व्यवस्था गर्नुपर्ने माग बढेको छ। जीवितै रहेको सूचना प्राप्त भएका टीकापुरका ३५ जना कामदारको सकुशल उद्धारका लागि परिवार, आफन्त तथा स्थानीयवासीले प्रार्थना गरिरहेका छन्।