फेरि ह्वात्तै बढ्न थाल्यो कोरोना, सचेत रहौं

केही दिनयता मुलुकमा कोरोना संक्रमण निरन्तर उकालो लागेको छ । देशभरका मठमन्दिर, चिडियाखाना, संग्रहालयमा मानिसको भीड उत्तिकै छ । लापर्वाही गर्दै नेपालीहरू दर्शन गर्ने नाममा बालबच्चा बोकेर मन्दिर धाइरहेका छन् । यता, चिडियाखाना र संग्रहालय पनि कोरोना उत्पादन गर्ने कारखाना बनेका छन् । न मुखमा मास्क छ न सामाजिक दुरीको पालना । घुमघाम गर्ने जानेदेखि त्यहाँको हेरचाह गर्नेहरुको मुखमा मास्क छैन् । मास्क नलगाएर मन्दिर वरपरका व्यापारीले पनि लापरवाही देखाएका छन् ।

  अस्पतालले पनि गैरजिम्मेवारीपूर्ण कार्य गरिरहेको पाइन्छ । कोरोना नभए जसरी अस्पतालभित्र सर्वसाधारणहरु निस्फिक्री डुलिरहेका छन् । सरकारी होस् या निजी सबैले लापरवाही गरेका छन् । सर्वसाधारण र चिकित्सक दुवैले सरकारको मापदण्डको पालना गरेको पाइँदैन् ।

मास्क नै नलगाई भटाभट बिरामी चेकजाँच गरिरहेका छन् । उता, सर्वसाधारणलाई पनि आफ्नो स्वास्थ्यको ख्याल छैन् । यता, सार्वजनिक सवारी साधनको त कुरै नगरौं । भौतिक दुरी त सार्वजनिक यातायातमा सम्भव नै भएन् ।

सार्वजनिक सवारीमा ढोकासम्म यात्रु हुँदा पनि खाँदेको खाँद्यै गर्छन् । सहचालक र चालकले मास्क नै लगाउदैनन् । फुटपाथको हालत पनि उस्तै छ । सार्वजनिक पार्कलगायतका स्थानमा पनि जनस्वास्थ्य मापदण्ड पालना भएको भेटिदैन् । सिनेमा हल, सुपरमार्केट, वित्तीय संस्था, सरकारी कार्यालय, दोहोरी साँझ, डान्स बार, पार्टी प्यालेस, लामो रोडको सवारी साधनको टिकट काट्ने काउण्टरलगायतका क्षेत्रमा अति नै लापरवाही भएको छ । कसैलाई आफ्नो ज्यानको माया नै भएको देखिदैन् ।

कोरोना बढेको बढ्यै छ तर सबैले ख्यालख्याल गरिरहेका छन् । राजनीतिक दलहरु कार्यक्रम गर्छन् तर एउटा सामान्य मास्क लगाउन बिर्सिन्छन् । धमाधम कार्यक्रम गरेर कोरोना फैलाउने काम नेताद्वारा भइरहेको छ । भाषण ठोक्नेदेखि लिएर सुन्ने सबैको मुख खुल्लै हुन्छ । एउटालाई कोरोना लागेको रहेछ भने त्यहाँ सबै  भष्म हुन्छन् । तैपनि कोही पनि अलिकति सतर्क र  जिम्मेवार भएका छैनन् ।

जिल्ला प्रशासन कार्यालय, यातायात कार्यालय, मालपोत र राहदानी विभागमा जतिखेर पनि भीड हुन्छ । मान्छेको हुल हुन्छ । त्यत्रो हुलमा मास्क लगाएका एकदुई जना मात्र भेटिन्छन् । त्यहाँ दुरीको त कल्पनै गरेरै साध्य छैन् ।

यता, विद्यार्थीहरु पनि कोरोनाको चपेटामा पर्ने निश्चित छ । एउटै बेञ्चमा आधा दर्जन विद्यार्थी राखेर पढाइन्छ । तर, तीमध्ये कसैले पनि मास्क लगाउदैन् । बच्चालाई त मास्क लगाउने कि नलगाउने के थाहा । आमाबुवा र विद्यालय जिम्मेवार बनिदिनुपर्यो ।

ट्राफिक व्यवस्थापन गर्न बसेका ट्राफिक प्रहरी पनि जिम्मेवार छैनन् । ड्युटीमा खटिएका ट्राफिकले नै मास्क लगाउन बिर्सिएका छन् । सुरक्षा दिनबाट खटाइएका सुरक्षाकर्मी आफैपनि कोरोनाबाट सुरक्षित छैन् । उनीहरु सुरक्षित नबन्दा यसको चपेटामा पुरै समुदाय परेको छ ।

सुरक्षाकर्मीहरु पनि गैरजिम्मेवार भइदिएका छन् । देशको ओहोदामा बसेका मन्त्रीहरु आफै पनि स्वास्थ्य मापदण्डको पालना गर्दैनन् भने अरुलाई के सिकाउछन् ? सिंहदरबारका कर्मचारीहरु पनि मास्क लगाउदैनन् । संसद्मा पनि त्यस्तै छ । सभामुख र सांसद्हरु समेत मास्क नलगाइ बसेका हुन्छन् । अलिकति पनि जिम्मेवार छैनन् ।

देशका राष्ट्रपति, प्रधानमन्त्री र मन्त्रीले नै हेलचेक्रयाइ गरेका छन् । अभिभावक नै छाडा भएपछि छोराछोरी पनि त्यही सिक्ने भइहाले । बाहिरी मुलुकमा कोरोना बढेसंगै नेपाल फर्किनेको संख्या ह्वात्तै बढेको छ । छिमेकी भारतदेखि लिएर अन्य थुप्रै मुलुकबाट नेपालीहरु धमाधम फर्किदै छन् । एयरपोर्टमा एउटा हेल्थ डेस्कको व्यवस्थासमेत गरिएको छैन् ।

नेपाल आउनेबित्तिकै ऊ आफ्नो घर गइहाल्छ । जसको कारण कोरोनाले थप विकराल रुप लिने देखिन्छ । एयरपोर्टको भीडभाड हेरिसाध्य छैन् । बाहिरबाट आउने र यहाँबाट जानेको भीड थेगिनसक्नु छ । उनीहरुको आफन्त पनि एयरपोर्टमै भेटिन्छन् । यस्तो हुँदा पनि सुरक्षाकर्मीहरु टुलुटुलु हेरेर बसेका छन् ।

भारतमा कोरोना दर उकालो लागेसंगै नेपाल भित्रिने लर्को लागेको छ । कामको सिलसिलामा भारत पुगेकाहरुले कोरोना भित्राइरहेका छन् । सीमानाकामा अलिकति पनि कडाइ नगर्दा यसको मारमा पुरै नेपाली परेका छन् । त्यस्तै, चलचित्रकर्मीले भिडियो, फिल्म बनाउदा एउटा निश्चित मापदण्ड बनाएका छैनन् ।

फिल्ममा नाँच्नेदेखि लिएर हेर्नेको भीड उस्तै हुन्छ । ठेलमठेल गरेर हेर्नलाई दर्शन पुगेका हुन्छन् । त्योपनि कोरोना फैलाउने कारखाना साबित भएको छ । घरघरमा कबाडी संकलन गर्न आउने र गाडामा तरकारी लिएर हिड्नेहरुले पनि कोरोना फैलाउन सहयोग गरेका छन् । हिजोको दिनमा कोरोनाले च्यापेको कुरा सबैले बिर्सिसकेका छन् ।

पैसाबाट समेत कोरोना सर्छ भनेर त्यसमा स्यानिटाइजर छर्किने कामसमेत भयो । तर, अहिले यो सबै बन्द भएको छ । अहिले एउटालाई अर्कोलाई ठेल्दै हिड्छन् । हात मिलाउन होइन् अँगालो हाल्न पनि बेर लगाउदैनन् । कोरोना कै कारणले नेपालमा लगभग १२ हजार नेपालीले ज्यान गुमाइसकेका छन् । तरपनि कसैको चेत खुलेको छैन् ।

स्वास्थ्य तथा जनसंख्या मन्त्रालयले दिनहु कोरोनाको विवरण सार्वजनिक गर्छ । मन्त्रालयले दिएको विवरणले कोरोना बढेको छ भनेर पुष्टि हुन्छ । यत्रो कोरोना बढ्दा मन्त्रालयले स्वास्थ्य मापदण्डको पालना गरौं भनेर एउटा सूचनासमेत जारी गरेको छैन् । व्यापार व्यवसायलाई पनि कडाइ गरेको पाइदैन् ।

सरकारले कडाइ नगर्दा नेपालीहरु मर्ने दिन फेरि पनि सुरु हुदैछ । मन्त्रालय व्यापारी सामु लम्पसार परेको हो ? कि त अहिलेको स्वास्थ्यमन्त्रीलाई पनि जनताभन्दा ठूलो कर र कमिशन भएको छ ? अहिलेका स्वास्थ्यमन्त्री भवानीप्रसाद खापुङले कोरोना नियन्त्रण गर्न चासो देखाएका छैनन् । मापदण्ड पालना गर्न जोड दिनु उनको जिम्मेवार हो ।

कोरोनाको मापदडसमेत पालना गर्न सक्ने क्षमता नभएकालाई मन्त्री बनाइएको छ । दैनिक भेटिएकोमध्ये सबैभन्दा धेरै कोरोना उपत्यकाभित्र छ । आधाभन्दा धेरै संक्रमित त उपत्यकामै छ । उपत्यकामा भव्य कोरोना फैलिदा पनि सरकारले थानकोट र साँगा नाका बन्द गरेको छैन् ।

यसअघिका काठ्माडौं महानगरपालिकाका मेयर विद्यासुन्दर शाक्यले उपत्यकामा कोरोना संक्रमण बढेपछि ललितपुर महानगरपालिका र भक्तपुर नगरपालिकाका मेयरलाई बैठक बोलाएर नाका बन्द गर्ने निर्णय गरेका थिए ।  मेयरले कडाइ गरेपछि कोरोनाबाट क्षति कम भएको थियो । तर, अहिलेका मेयरको यतापट्टि ध्यान गएको छैन् ।

उपत्यकावासीलाई कसरी बचाउने ? कोरोना कसरी नियन्त्रण गर्ने ? यिनीहरुसंग योजना छैन् । यसअघि कोरोना चेक नगरी, क्वारेन्टिनमा साता नबिताइकन गाउँघर छिर्न मनाही थियो । तर, अहिले त्यो हराइसकेको छ । विदेश हाेस् वा स्वदेश, जो जहाँबाट आएपनि, गएपनि सिधै आफ्नो घर गइरहेका छन् । स्वास्थ्यमन्त्री ह्दय त्रिपाठी र भानु ढकालले लकडाउन गरेर पनि जनता बचाए ।

कोरोना संक्रमणका कारण मोरङ कारागारमा एक कैदीबन्दीको मृत्यु भएको छ । केही दिनयता कैदीबन्दीमा ज्वरो आउने समस्या देखिएको थियो ।

कोसी अस्पतालमा उपचाररतमध्ये सुन्दरहरैँचा नगरपालिका–४ का ३९ वर्षीय कैदी नीरबहादुर नेपालको मृत्यु भएको कोसी अस्पतालले जनाएको छ ।

अहिले उक्त कारागारमा कोरोना फैलिएको छ । विराटनगर महानगरपालिका–८, हाटखोलास्थित  कारागारका १९ कैदीबन्दीमा कोरोनाको लक्षण देखिएपछि एन्टिजेन्ट विधिबाट परीक्षण गर्दा १६ जनामा संक्रमण देखिएको थियो ।

अस्पतालका मेडिकल सुपरिटेन्डेन्ट डा. यज्ञराज खरेलले एन्टिजेन्ट परीक्षण गर्दा पोजिटिभ रिपोर्ट आएको र अब सबैको पीसीआर परीक्षण  गर्ने तयारी भइरहेको बताए ।