चिनियाँ कम्युनिष्ट पार्टीको राष्ट्रिय सम्मेलनबाट पूर्वराष्ट्रपति हु जिन्ताओलाई अपमानपूर्वक बाहिर निकालियो

चीनका पूर्वराष्ट्रपति तथा पार्टीका पूर्वमहासचिव हु जिन्ताओलाई चिनियाँ कम्युनिष्ट पार्टीको २० औँ राष्ट्रिय सम्मेलनको समापन समारोहबाट अपमानपूर्वक बाहिर निकालिएको छ ।

बेइजिङको ग्रेट हल अफ द पिपुलमा एक सातादेखि चलिरहेको सम्मेलनको शनिवार भइरहेको समापन समारोहमा हलको पहिलो लहरमा राष्ट्रपति सि जिनपिङसँगै बसेका हु जिन्ताओलाई मार्सल लगाएर हलबाट बाहिर निकालिएको भिडियो अन्तर्राष्ट्रिय सञ्चारमाध्यममा भाइरल भइरहेको छ । 

सी जिनपिङलाई तेस्रो कार्यकालको लागि पार्टीको महासचिव चुनेको उक्त समारोहबाट पूर्वराष्ट्रपति तथा पार्टीका पूर्वमहासचिव हु जिन्ताओलाई किन निकालियो भन्नेबारे भने खुलेको छैन । 

एएफपीले सार्वजनिक गरेको भिडियोमा हु जिन्ताओ राष्ट्रपति सि जिनपिङको बायाँतर्फको कुर्सीमा बसेका छन् । हु को नजिक आएर एकजना पुरूषले उनलाई बसेको कुर्सीबाट उठाउन खोज्दा उनी उठ्न मान्दैनन् । पछि ती पुरूषले हुँ को पाखुरामा सामातेर जबर्जस्त उठाउन खोज्छन् तर, पनि हुुँ आफ्नो कुर्सी छाड्न मान्दैनन् ।

त्यति नै बेला राष्ट्रपति सि हुतर्फ फर्कन्छन् र केही भनेजस्तो गर्छन् । 

चिनियाँ कंग्रेसका अध्यक्ष ली चान्सुले हुँलाई केही भनिरहेका हुन्छन् । अझै पनि उनी आफ्नो कुर्सीबाट उठ्न मान्दैनन् । त्यतिबेलासम्म हुँ को दस्तावेज चान्सुको हातमा पुगेको हुन्छ । हुँ कुर्सीबाट उठ्नै लाग्दा राष्ट्रपति सी को अगाडि रहेको दस्तावेज लिन खोज्छन तर, सी जिनपिङले हत्तपत्त आफ्नो दस्तावेज सम्हाल्छन् ।

हु लाई दुई जना व्यक्तिले कुर्सीबाट जवर्जस्त उठाउँछन् र हलबाट बाहिर निकाल्छन् । हु जिन्ताओ आफ्नो कुर्सीबाट उठेपछि चान्सुले उनको दस्तावेज हुलाई दिन्छन् । कुर्सीबाट उठेर जाँदै गर्दा हु र सि जिनपिङको असाध्यै संक्षिप्त संवाद भएको देखिन्छ । हु अगाडि बढेर प्रधानमन्त्री ली खस्याङलाई धाप मार्छन् । त्यसपछि उनलाई दुई जना पुरुषहरूले हलबाट बाहिर लिएर जान्छन् ।

समापन समारोहबाट हु लाई यति अपमानित ढंगले किन हलबाट बाहिर निकालियो भन्ने खुलेको छैन ।

• हलबाट बाहिर निस्किँदै गर्दा ७९ वर्षीय हु असाध्यै मलिन मुद्रामा देखिन्छन् ।