नेकपा एस संसदीय दलको नेतामा माधव नेपाल सर्वसम्मत.
काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले सत्तागठबन्धनमा सहमति र समझदारीबाटै प्रधानमन्त्री टुंगिने बताएका छन् । बाहिर आएजस्तो आफ्नो दाबी नभएको प्रष्टीकरण दिँदै उनले अवसर आए जिम्मेवारी लिने बताए ।
प्रेस सेन्टर नेपाल चितवनले आयोजना गरेको पत्रकार सम्मेलनमा प्रचण्डले चुनावअघि कांग्रेसँग आलोपालो सहमति भने भएको बताए ।
‘प्रधानमन्त्री माओवादीको बटमलाइन भन्ने छैन । सहमति र समझदारीबाटै टुंग्याउने हो । सहमतिमै जिम्मेवारी आयो भने लिने हुन्छ । चुनावअघि आलोपालो गर्ने सहमति भएको हो अहिले पनि छ त्यो समझदारी ‘, उनले भने ।
कांग्रेसले आफ्नै नेतृत्वमा सरकार बनाउने निर्णय गरेपनि त्यो गठबन्धनमा समझदारीकै आधारमा हुने प्रचण्डले बताए ।
एमालेसँगको तालमेलको सम्भावनालाई उनले नकारेनन् । कांग्रेसले प्रधानमन्त्री नदिए एमालेसँग मिलेर सरकार चलाउने दाउसम्बन्धी पत्रकारको प्रश्नमा उनले भने, ‘स्वभावैले निर्वाचनपछि सबै राजनीतिक दलसँग छलफल चलेको छ । नयाँ आएका पार्टीसँग पनि कुरा चलिरहेको छ ।’
आफूले अहिलेसम्म प्रधानमन्त्रीका निम्ति सबै चिज दाउमा लगाउने काम कहिल्यै नगरेको प्रचण्डको जिकिर छ ।
‘गठबन्धन, संविधान, निर्वाचनको निम्ति धेरै नेताहरूलाई प्रधानमन्त्री प्रस्ताव गरेको छु । आफैँ हुनुपर्छ भनेको छैन ‘, प्रचण्डको भनाइ थियो ।
माओवादीमात्र नभए गठबन्धनका सबै दलहरूको एमालेसँग संवाद भइरहेको भन्दै उनले कांग्रेस र एमालेकै पनि भइरहेको बताए ।
प्रचण्डले थपे, ‘कुरा हुने कुरैले टुंगोमा पुग्यो भन्ने सोच्न हुँदैन । तर, अहिले गठबन्धनमा छौं गठबन्धन नै कायम रहन्छ ।’
राष्ट्रपति, उपराष्ट्रपति, सभामुख, उपसभामुख र प्रधानमन्त्री प्याकेजमै टुंग्याउने भन्दै उनले राष्ट्रपतिबाट आव्हान भएको ७ दिनकै समयसीमामा टुंगिने बताए ।
