नेपालको नयाँ राष्ट्रपतिमा भारतीय प्रोफेसरको चासो
काठमाडौं । नेपालका आन्तरिक मामलाहरुमा टिप्पणी गरिराख्ने भारतीय चिन्तक एसडी मुनीले आगामी राष्ट्रपति चयनका विषयमा चासो राखेका छन् ।
उनले सोमबार ट्वीट गर्दै प्रधानमन्त्री पुष्पकमल दाहाल प्रचण्डको भनाइलाई बल पुग्नेगरी नेपालको नयाँ राष्ट्रपति उम्मेदवारका विषयमा आफ्नो राय प्रस्तुत गरेका हुन् । उनले राष्ट्रपतिमा राष्ट्रिय सहमति खोज्ने माग जायज भएको उल्लेख गर्दै चार जना गैरराजनीतिक व्यक्तिको नामसमेत लिएका छन् ।
राष्ट्रपति निर्वाचनका लागि दलहरूबीच उम्मेदवार छनोट गर्न सकस परिरहेका बेला एसडी मुनीले राष्ट्रपतिका लागि अनुराधा कोइराला, दमननाथ ढुंगाना, देवेन्द्रराज पाण्डे र प्राध्यापक बरालको नाम लिएका छन् ।
उनले भनेका छन्, ‘नेपालमा सर्वसम्मतिबाट नयाँ राष्ट्रपतिको माग जायज छ ।’ प्रधानमन्त्री प्रचण्ड र माओवादी केन्द्रले राष्ट्रपति उम्मेदवारमा राष्ट्रिय सहमति हुनुपर्ने बताउँदै आएका छन् । तर, नेकपा एमालेले यसमा विरोध गर्दै आएको छ । पुस १० को सहमतिअनुसार उसले एमालेको उम्मेदवार राष्ट्रपति बन्नुपर्ने अडान राख्दै आएको छ ।
एमाले अध्यक्ष केपी शर्मा ओलीले उम्मेदवारको नाम १३ गते मात्रै सार्वजनिक गर्ने बताएका छन् । तर, स्रोतका अनुसार एमालेले राष्ट्रपतिमा ईश्वर पोखरेलको पक्षमा लबिङ गर्दै आएको छ ।
फागुन २५ गते नयाँ राष्ट्रपतिको निर्वाचन हुँदैछ । त्यसका लागि फागुन १३ गते उम्मेदवारी दर्ताको कार्यक्रम छ । हालकी राष्ट्रपति विद्यादेवी भण्डारीको कार्यकाल भने फागुन २८ गते सकिने छ ।
