मिटरब्याजी पीडितको टाउकोमा प्रहरीको लाठी
काठमाडौं । काठमाडौंमा मिटरब्याज पीडित र प्रहरीबीच सोमबार झडप भएको छ । प्रहरीले मिटरब्याज पीडितलाई लखेट्न पानीको फोहोरा र लाठी हानेको छ ।
झडपमा परी केही मिटरब्याज पीडित घाइते भएका छन् भने केहीलाई प्रहरीले पक्राउ समेत गरेको छ । शान्तिवाटिकामा आन्दोलन गरिरहेका मिटरब्याज पीडितले सोमबार सिंहदरबार वरपर प्रदर्शन गर्ने तयारी गरेका थिए ।
प्रहरी पनि विहानैदेखि शान्तिवाटिकाको गेटमा तैनाथ थिए । दिउँसो मिटरब्याज पीडित ब्यानरसहित प्रदर्शनमा निस्कने क्रममा प्रहरीले मिटरब्याज पीडितमाथी लाठी र पानीको फोहोरा हानेको हो ।
त्यस क्रममा प्रहरीको लाठी लागेर ४/५ जना मिटरब्याज पीडित घाइते भएका छन् भने केहीलाई प्रहरीले पक्राउ गरेको प्रत्यक्षदर्शीको भनाई छ । घाइतेहरुको राष्ट्रिय ट्रमा सेन्टरमा उपचार भइरहेको छ ।
सरकारले मिटरब्याज पीडितको एक समूहसँग १८ चैतमा पाँच बुँदे सहमति गरेको थियो । तर उक्त सहमतिले मिटरब्याज पीडितको तत्कालको समस्या समाधान नहुने भन्दै मिटरब्याज पीडितको अर्को समूह काठमाडौंमा आन्दोलनमा गरिरहेका छन् ।
