सरकारबारे निर्णय गर्न रास्वपाको बैठक बस्दै
काठमाडौं । राष्ट्रिय स्वतन्त्र पार्टी (रास्वपा)ले केन्द्रीय समिति र संसदीय दलको संयुक्त बैठक आज बस्दै छ । रास्वपाले सरकारमा सहभागता र सरकारलाई दिएको समर्थनबारे निर्णय गर्नका लागि बैठक बोलाएको हो ।
आज साँझ ५ बजे बस्ने बैठकले सरकारबारे निर्णय गर्ने रास्वपाका एक नेताले जानकारी दिए । सभापति लामिछानेको नागरिकता विवादमा सांसद पद गुमेपछि रास्वपाका मन्त्रीहरु सरकारबाट बाहिरिएका थिए । तर उसले सरकारको समर्थन भने कायमै राखेको छ ।
वैशाख १० को उपनिर्वाचन जितेर लामिछाने पुनः सांसद बनेपछि रास्वपालाई सरकारमा ल्याउन सत्ता गठबन्धनले प्रयास जारी राखेको छ । यद्यपि लामिछानेले यथास्थितिमा सरकारको समर्थन कायम राखीराख्ने पक्षमा नरहेको प्रतिक्रिया दिएका थिए । उनले पहिलेकै मन्त्रालय पाए सरकारमा जाने नत्र प्रतिपक्षमा बस्ने जनाएको छ ।
त्यसयता प्रधानमन्त्री पुष्पकमल दाहाल प्रचण्ड र सत्ता गठबन्धनका अन्य नेताहरुले लामिछानेलाई फकाउने प्रयास जारी राखेका छन् । प्रधानमन्त्री प्रचण्डले चितवनको एक औपचारिक कार्यक्रममा लामिछानेलाई सरकारमा आउन आह्वान गरेका थिए ।
