हिन्दू राष्ट्रको पक्षमा हामीले ल्याएको प्रस्तावमा प्रधानमन्त्रीको अग्निपरीक्षा हुन्छ: राजेन्द्र लिङ्देन
काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनले प्रधानमन्त्री पुष्पकमल दाहालले जनतालाई देखाउनमात्रै पशुपतिनाथको दर्शन गरेको टिप्पणी गरेका छन् ।
प्रतिनिधिसभाको बैठकपछि सञ्चारकर्मीहरुसँग कुरा गर्दै उनले देशको प्रधानमन्त्री, मन्त्री, प्रतिनिधिले हिन्दू राष्ट्रको मुद्दालाई अन्तरहृदयबाट नै स्वीकार गरेको भए स्वागतयोग्य रहेको बताए ।
‘धर्म भन्ने चिज नराम्रो होइन । हामीले धर्मको नाममा राजनीति गर्छन् भने अरुले अधर्मको राजनीति गर्छन् ? धर्म कहीं गलत र नकारात्मक अर्थमा प्रयोग हुन्छ ? धर्म भन्ने नै सत्य हो, न्याय हो । राम्रो अर्थमा मात्रै प्रयोग हुन्छ’, अध्यक्ष लिङदेनले भने, ‘धर्मरहित राजनीति कसैले गर्छ भनेर उसमाथि सबैले शंका व्यक्त गर्नुपर्ने हुन्छ । हामीले हिन्दू राज्यको कुरा गरेको केवल पूजा अराधनामात्रै होइन । उपयुक्त समयमा हामीले संविधान संशोधनको प्रस्ताव लान्छौं । त्यसबेला प्रधानमन्त्रीको अग्निपरीक्षा हुन्छ ।’
प्रधानमन्त्री प्रचण्डले भारत भ्रमणमा भारतीयहरुले गेरुवस्त्र लगाइदिएपछि पशुपतिनाथमा पहिलो पटक पुगेर नेपालीहरुलाई देखाउन खोजेको उनको भनाइ छ ।
प्रचण्डले पशुपतिनाथको दर्शन गर्नुको रहस्य राप्रपाले हिन्दू राष्ट्र बनाउन ल्याएको प्रस्तावबाट पत्ता लाग्ने लिङदेनले जिकिर गरे ।
