संसद्को अवरोध हटाउन प्रमुख प्रतिपक्षी दलसँग संवाद गर्छु- प्रधानमन्त्री
काठमाडौं । सभामुख देवराज घिमिरेले प्रधानमन्त्री पुष्पकमल दाहाल ‘प्रचण्ड’सँग लामो समयदेखि अवरुद्ध संसद् खुलाउन पहल गर्न अनुरोध गरेका छन् ।
संसद्को अवरोध खुलाउने सन्दर्भमा प्रधानमन्त्रीको सरकारी निवास बालुवाटार पुगेका सभामुख घिमिरेले सभामुखको रूपमा आफूले सहमतिका लागि जिम्मेवारीपूर्वक पहल गरेको भए पनि परिणाममा निस्किन सकेन भन्दै सत्ता प्रतिपक्षी दलका नेताहरूसँग गम्भीरतापूर्वक छलफल गर्न प्रधानमन्त्रीलाई आग्रह गरेका हुन् ।
सभामुख घिमिरेले प्रधानमन्त्रीसमक्ष प्राकृतिक विपत्ति लगायतका धेरै विषयमा सांसदहरूले बोल्न नपाएको, आम जनताले सदन अवरोधलाई राम्रो नमानेको लगायत गुनासो आएको भन्दै सदन खोल्नुको विकल्प नरहेको बताएका थिए ।
भेटका क्रममा प्रधानमन्त्री प्रचण्डले सदन खुलाउने सन्दर्भमा प्रमुख प्रतिपक्षी दलसँग छलफल थप छलफल गरेर छिट्टै सदन खोल्ने वातावरण बनाउने प्रतिबद्धता व्यक्त गरेका थिए । भेटका क्रममा प्रधानमन्त्री प्रचण्डले भने– ‘म पनि सदन खुलाउन भूमिका खेल्छु । तपाईँ पनि लाग्नुहोस् । छिट्टै सहमति गर्नै पर्छ । म प्रमुख विपक्षी दलको नेतासँग सघन छलफल गर्छु ।’
प्रधानमन्त्री प्रचण्डले सभामुखसँग प्रमुख प्रतिपक्षी दलसँग थप छलफल गरेर निकास खोज्ने बताएसँगै महिना दिनदेखि अवरुद्ध संसद् खुल्ने अपेक्षा गरिएको छ ।
नक्कली सुन प्रकरणमा उच्चस्तरीय संसदीय समिति बनाएर छानबिन गर्नुपर्ने माग राख्दै प्रमुख प्रतिपक्षी दल नेकपा एमालेले महिना दिनदेखि संसद् अवरुद्ध गर्दै आएको छ ।
