सिआइबीले माधव र बाबुरामसँग लियो बयान
काठमाडौं । नेपाल प्रहरीको केन्द्रीय अनुसन्धान ब्युरो (सिआइबी) ले बालुवाटारस्थित ललिता निवासको जग्गा प्रकरणमा पूर्वप्रधानमन्त्रीद्वय माधव नेपाल र डा बाबुराम भट्टराईसँग बयान लिएको छ ।
सिआबीको टोलीले आइतबार साँझ नेकपा एकीकृत समाजवादीका अध्यक्ष समेत रहेका नेपाल र नेसपाका अध्यक्ष भट्टराईसँग सोधपुछ गरेको हो । सर्वोच्च अदालतले भट्टराई र नेपालसँग पनि सोधपुछ गर्न बाटो खुला गरेपछि सिआइबीले उनीहरुसँग बयान लिएको हो ।
सिआइबी प्रमुख किरण बज्राचार्यले भट्टराई र नेपालसँग सोधपुछ गरिएको जानकारी दिए । यसअघि उनीहरुसँग बयान नलिई यस प्रकरणको अनुसन्धान प्रतिवेदन सरकारी वकिललाई बुझाउन लागेपछि चौतर्फी आलोचना बढेको थियो ।
नेता नेपाल २०६६–६७ सालमा प्रधानमन्त्री रहेको बेला बिशिष्ट व्यक्तिको निवास विस्तारका नाममा ललितानिवास परिसरको जग्गा नक्कली मोहीलाई दिएर हिनामिना भएको थियो ।
यसैगरी ५ माघ २०६९ मा मालपोत कार्यालय, डिल्लीबजारले ललिता निवासभित्र रहेको ६० आना जग्गा पशुपति टिकिन्छा गुठीका नाममा दर्ता गर्ने निर्णय गरेको थियो । डा. भट्टराई नेतृत्वको तत्कालीन मन्त्रिपरिषदले यसबारेमा सैद्धान्तिक स्वीकृति दिने निर्णय गरेको थियो । त्यसैले उनी पनि यो प्रकरणमा जोडिएका हुन् ।
