सरकारी गाडी नियन्त्रणमा लिएर युवा संघले ट्राफिकलाई बुझाए
जनकपुरधाम । नेकपा एमाले निकट राष्ट्रिय युवा संघ धनुषाले जनकपुरधाममा शनिवार पनि सरकारी गाडीको दुरुपयोग गर्ने गाडीहरु नियन्त्रणमा लिएको छ ।
भानु चोकबाट यूवा संघका कार्यकर्ताहरुले ९ वटा सरकारी गाडी नियन्त्रणमा लिएको हुन् । सरकारी गाडी दुरुपयोग रोक्ने उनीहरुको अभियानलाई ट्राफिक प्रहरीले सघाएको छ ।
प्रदेश आमसञ्चार प्राधिकरणका अध्यक्ष श्यामसुन्दर यादवले चढेको सरकारी गाडी पनि उनीहरु नियन्त्रणमा लिएको थियो । आमसञ्चार सम्बन्धी कार्यक्रमका लागि रौतहट जान लागेको भन्दै चिट्ठी समेत देखाएपछि आफूलाई छाडेको अध्यक्ष यादवले बताए ।
सेतो नम्बर प्लेटको सरकारी चारपाङ्ग्रे गाडी ३ थान, मोटरसाइकल ५ थान र एउटा स्कुटर नियन्त्रणमा लिएर आवश्यक कारबाहीका लागि जिल्ला ट्राफिक प्रहरी कार्यालयको जिम्मा लगाएको युवा संघ मधेश प्रदेशका अध्यक्ष लव अधिकारीले जानकारी दिए ।
विदाको दिन सरकारी गाडी गुडाउन प्रमुख जिल्ला अधिकारीसंग अनुमति लिनुपर्छ । तर अनुमति नलिएरै सरकारी गाडी नीजि काममा प्रयोग गर्ने प्रवृत्ति बढेपछि नियन्त्रणमा लिएर कारबाही गर्न अभियान चलाएको युवा संघले जनाको छ ।
