विद्युत् महशुल नतिरेपछि लुम्बिनीको स्वास्थ्य मन्त्रालयको लाइन काटियो, ५ दिनदेखि सबै काम प्रभावित
रूपन्देही । विद्युत् महशुल नतिरेपछि लुम्बिनी प्रदेशको स्वास्थ्य मन्त्रालयको लाइन काटिएको छ ।
लाइट काटिएपछि मन्त्रालय विद्युतविहीन भएको छ । नेपाल विद्युत् प्राधिकरणले मन्त्रालयमा जडान भएको विद्युत् लाइन कटौती गरेपछि मन्त्रालय विद्युतविहीन हुन पुगेको हो ।
स्वास्थ्य मन्त्रालयको नाममा बुटवलमा मिटर जडान भएको र त्यहाँको रकम भुक्तानी नभएपछि राप्ती उपत्यका देउखुरीमा रहेको मन्त्रालयको विद्युत् कनेक्सन काटिएको नेपाल विद्युत् प्राधिकरण लमही शाखाले जनाएको छ ।
कार्यालय प्रमुख युवराज रावतका अनुसार बुटवलमा मन्त्रालयको नाममा जडान भएको विद्युतको बाँकी बक्यौता महशुल दुई लाख ७२ हजार दुई सय ६४ रुपैयाँ ४४ पैसा भुक्तानी गर्न बाँकी छ । सो रकम भुक्तानी गर्ने विषयमा मन्त्रालयले कुनै जिम्मेवारी नलिएपछि बाध्य भएर राप्ती उपत्यका देउखुरीमा रहेको मन्त्रालयको विद्युत् कटौती गर्नुपरेको दाबी रावतको छ ।
‘बुटवल कार्यालयबाट पटक पटक पत्राचार भए अनुसार हामीले यहाँबाट मन्त्रालयको विद्युत् काट्नुपर्यो’रावतले भने,‘यहाँ मन्त्रालयको नाममा जडान भएको विद्युतको भने बाँकी बक्यौता छैन । बुटवलको रकम नतिर्दा यहाँबाट बिजुली काट्नुपर्यो ।’
राप्ती उपत्यका देउखुरीमा रहेको मन्त्रालयमा मंसिर ५ गते विद्युत् काटिएको हो । हालसम्म बिजुली जडान नहुँदा मन्त्रालयको कामकाज प्रभावित छ । बुटवल स्वास्थ्य मन्त्रालय बसेको कार्यालयमा गैर सरकारी संस्थाको कार्यालय रहेका छन् ।
यता स्वास्थ्य मन्त्रालयका सचिव डाक्टर जनार्दन शर्माले विना जानकारी बिजुली काटिएको बताए । ‘पत्र पठाएको २४ घण्टाभित्र बिजुली काटियो । पैसा नतिर्ने भन्ने हुन्न, महशुल भुक्तानीको लागि काम हुँदै छ ।’
मन्त्रालयमा ५ दिनदेखि लाइन नभएकोले सबै काम प्रभावित बनेको मन्त्रालयका सूचना अधिकारी अमर वलीले जानकारी दिए ।
‘एक दिन त व्याकअपले काम गर्यो, त्यसपछि रोकिएको छ, जोड्ने प्रक्रियाका लागि काम भइरहेको छ, सचिवज्यू काठमाडौं जानुभएको छ,’ उनले भने ।
