आजियाटा बाहिरिएसँगै एनसेलमा भित्रियो स्पेक्ट्रलाइट
काठमाडौं । एनसेल कम्पनीको ८० प्रतिशत सेयर स्पेक्ट्रलाइट युके लिमिटेडले किन्ने सम्झौता भएको छ। आजियाटाले एनसेलबाट बाहिरिने निर्णय गरेसँगै सिंगापुरमा बस्ने नेपाली सतिशलाल आचार्यको स्पेक्ट्रलाइट कम्पनीले एनसेलको ८० प्रतिशत सेयर किनेको हो।
यसअगाडि नै एनसेलको २० प्रतिशत सेयर रहेको स्पेक्ट्रलाइटले शुक्रबार बांकी ८० प्रतिशत सेयर किन्ने सम्झौता गरेको एनसेलले जारी गरेको विज्ञप्तिमा उल्लेख छ। अब एनसेलको शतप्रतिशत सेयर नै स्पेक्ट्रलाइटको रहने छ।
‘एनसेलको सेयर प्राप्तिको लागि सम्झौता भएको घोषणा गर्न पाउँदा स्पेक्ट्रलाइट खुसी छ,’ आचार्यले भनेका छन्, ‘दूरसञ्चार क्षेत्रमा रहेको मेरो अनुभवलाई आविष्कार, लगानी र नेपाली जनतालाई सेवा प्रदान गर्न एनसेलको व्यवस्थापनसँग काम गर्नेछु।’
व्यावसायिक चुनौती बढेको भन्दै आजियाटा समूहले एनसेलबाट लगानी झिक्ने घोषणा गरेको थियो। बाहिरिएसँगै आजियाटाले कम्पनीले सेयर बिक्रीमा राखेको थियो।
आजियाटाले सन् २०१६ मा स्विडिस कम्पनी टेलिया सोनेरासँग सेयर किनेको थियो। त्यतिबेला एनसेलको भ्यालुएसन एक खर्ब ४० अर्ब रूपैयाँभन्दा बढी थियो।
