गौशाला २६ को तस्बिर सामाजिक सञ्जालमा भाइरल हुँदै, प्रहरीमा दिइन् उजुरी

काठमाडौं । क्रिकेटर सन्दीप लामिछानेमाथि मुद्दा दायर गरेर चर्चामा आइन् गौशाला २६ (प्रहरीले दिएको नाम) । उनको वास्तविक नाम र पहिचान भने लामो समयसम्म गोप्य रहेको थियो ।

बलात्कारका मुद्दा दायर गर्ने जाहेरीकर्ताको वास्तवित नाम र पहिचान सामान्यतया प्रहरीले सार्वजनिक गर्दैन । पहिचान खुलाउँदा उनीहरु सामाजमा मुख देखाएर हिँड्न सक्दैनन् भन्ने परम्परागत भाष्य तथा कानूनी व्यवस्थाका कारण नाम लुकाउने अभ्यास गरिएको हो । यद्यपि, आरोपीको पहिचान खुलाउने र जाहेरीकर्ताको लुकाउने अभ्यास सान्दर्भिक हो वा होइन भन्नेबारे बहसहरु जारी छन् ।

यसैबीच पछिल्ला केही दिनदेखि गौशालाको तस्बिरहरु सामाजिक सञ्जालमा देखिन थालेका छन् । उनको इन्टाग्राम पेजबाट पुरानो तस्विर निकालेर कसैले सामाजिक सञ्जालमा पोस्ट गरेपछि पहिचान सार्वजनिक भएको हो ।

यसअघि पनि उनको भन्दै तस्बिर भाइरल भएको थियो । तर, अहिले वास्तविक तस्बिर नै सार्वजनिक भएपछि उनी प्रहरीमा पुगेकी छन् । उनले आज साइबर ब्यूरो पुगेर उजुरी हालिन् ।

ब्युरोका प्रवक्ता पशुपति रायले उजुरी आएको र छानबिन भइरहेको बताए ।

‘गोपनियता हनन् सम्बन्धी मुद्धा सोझै अदालतमा पनि दर्ता गर्न सकिन्छ, अहिले हामीले पनि हेरिरहेका छौँ,’ एसपी रायले भने ।

।