एयरफोन चोरीको आरोपमा हत्या

कैलाली । धनगढी उपमहानगरपालिका–१४ फूलबारीमा एयरफोन चोरीको निहुँमा कुटपिटबाट एक युवकको ज्यान लिएको आरोपमा प्रहरीले मृतककै सहोदर भाइ र भाञ्जालाई पक्राउ गरेको छ।

जिल्ला प्रहरी कार्यालय कैलालीका अनुसार ३५ वर्षीय गणेश गिरीको हत्या अभियोगमा उनका सहोदर भाई ३३ वर्षीय पदम गिरी र भाञ्जा १८ वर्षीय प्रदीप बोहरा पक्राउ परेका हुन्।

प्रहरी नायब उपरीक्षक (डीएसपी) राजकुमार सिंहका अनुसार असार २८ गते राति प्रदीपले आफनो एयरफोन चोरी भएको भन्दै कुटपिट गरेका थिए। कुटपिटबाट गम्भीर घाइते भएका गणेश गिरीको असार ३० गते मृत्यु भएको थियो।

गिरीको शव परिवारले परम्परागत तरिकाले घरनजिकै गाडेका थिए। बिहीबार गिरीको भान्जाबाटै हत्या भएको खबर पुगेपछि कैलाली प्रहरीले गिरीको शव गाडिएको स्थानबाट उत्खनन् गरेको थियो ।

हत्या प्रकरणमा भान्जा बोहरा मुख्य आरोपीका रूपमा र सहोदर भाई पदम गिरीलाई मतियारको भूमिकामा संलग्न देखिएको भन्दै दुवैलाई नियन्त्रणमा लिएको प्रहरीले जनाएको छ।

अदालतबाट पाँच दिनको म्याद थप गरी थप अनुसन्धान भइरहेको प्रहरीले जानकारी दिएको छ। शव परीक्षणपछि मृतकको शव परिवारलाई बुझाइएको छ।