ओली र प्रचण्डको सुरक्षाकर्मी फिर्ता गरिएकोमा कांग्रेस-एमालेको आपत्ति, गृहमन्त्रीको यस्तो जवाफ
काठमाडौं । राष्ट्रपति रामचन्द्र पौडेलले डाकेको सर्वदलीय बैठकमा आज पहिलोपटक सरकार र राजनीतिक दलहरु आमनेसामने भए । स्रोतहरुका अनुसार सरकार पक्ष र कांग्रेस–एमालेका नेताहरुबीच सामान्य वाद प्रतिवाद र नोकझोक भएको थियो ।
कांग्रेस–एमालेका नेताहरुले पूर्वप्रधानमन्त्रीद्वय केपी शर्मा ओली र पुष्पकमल दाहाल प्रचण्डको सुरक्षाकर्मी फिर्ता गरिएको विषय उठाए । राजनीतिक प्रतिशोधवस सरकारले यस्तो निर्णय लिएको भन्दै उनीहरुले आपत्ति जनाएका थिए । बैठकमा उपस्थित गृहमन्त्री ओमप्रकाश अर्यालले यसको प्रतिवाद गरे ।
स्रोतका अनुसार गृहमन्त्रीले दलहरुको सरकारले बनाएको कार्यविधि र मापदण्डमा टेकेर नै यो निर्णय लिइएको बताएका थिए । उनले कोही नेतालाई अतिरिक्त सुरक्षा चाहिएको अवस्थामा परिस्थितिको मूल्यांकन गरेर सरकारले दिनसक्ने आश्वासन दिए । सुरक्षाकर्मीहरुलाई नेताहरुले अन्य घरायशी काममा दुरुपयोग गर्नु नहुनेमा पनि उनले ध्यानाकर्षण गराएका थिए ।
आजको बैठकमा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकमाथि परेको जाहेरीको विषय भने उठेन । यो विषयमा कुनै पनि चर्चा नै नभएको एक नेताले जानकारी दिएका छन् ।
