ट्याक्टर दुर्घटना हुँदा एकको मृत्यु, दुई घाइते
सल्यान, वैशाख २५ गते । सल्यानमा ट्याक्टर दुर्घटना हुँदा एक जनाको मृत्यु भएको छ । दुई जना घाइते भएका छन् । जिल्लाको दार्मा गाउँपालिका–२, भुसखोलास्थित भित्री सडक खण्डमा ट्याक्टर दुर्घटना भएको जिल्ला प्रहरी कार्यालयले जनाएको छ।
शुक्रबार दिउँसो करिब १ः३० बजे फारुलाचौरबाट भुसखोलातर्फ जाँदै गरेको रा. १ त. ४४९५ नम्बरको खाली ट्याक्टर सडकबाट करिब १५ मिटर तल खसेर दुर्घटना भएको हो । दुर्घटनामा ट्याक्टर चालक दार्मा गाउँपालिका–२ निवासी ग्वाजो कामीका १७ वर्षीय छोरा प्रदीप विक गम्भीर घाइते हुनुभएको थियो । उहाँलाई तत्काल उपचारका लागि थुम्के सल्ली स्वास्थ्यचौकी दार्मामा लगिएको थियो । स्वास्थ्यकर्मीले उहाँलाई मृत घोषणा गरेका हुन्।
दुर्घटनामा सोही स्थानका १७ वर्षीय टेकबहादुर विक सामान्य घाइते हुनुभएको छ। उहाँको शरीरका विभिन्न भागमा चोट लागेको र थुम्के सल्ली स्वास्थ्य चौकीमै उपचार भइरहेको प्रहरीले जनाएको छ । यस्तै, २२ वर्षीय विशाल विकको दाहिने हातमा चोट लागेको छ। उहाँको अवस्था मध्यम रहेको र थप उपचारका लागि नेपालगन्ज पठाइएको छ।
घटनाको जानकारीपछि इलाका प्रहरी कार्यालय दार्मा, सल्यानबाट प्रहरी सहायक निरीक्षक बुद्धी साउँदको कमान्डमा तीन जनाको टोली घटनास्थल पुगेको थियो । साथै थप अनुसन्धानका लागि जिल्ला प्रहरी कार्यालय सल्यानबाट प्रहरी निरीक्षक देवराज भट्टराईको कमान्डमा पाँच जना प्रहरी खटिएको प्रहरीले जनाएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।