दैलेखमा फोर्स गाडी कर्णाली नदीमा खस्यो, एक जनाको शव फेला, उद्धार कार्य जारी

दैलेख, १९ असार । सुर्खेतबाट कालिकोटतर्फ जाँदै गरेको फोर्स गाडी दैलेखको साङ्गेताडा क्षेत्रमा दुर्घटनाग्रस्त हुँदा एक जनाको मृत्यु भएको छ भने अन्य यात्रुको खोजी तथा उद्धार कार्य जारी रहेको छ।

प्रारम्भिक जानकारीअनुसार गाडी अनियन्त्रित भई सडकबाट करिब ६०० देखि ७०० मिटर तल कर्णाली नदीतर्फ खसेको हो। दुर्घटनाको प्रकृति अत्यन्त गम्भीर रहेको बताइएको छ।

घटनास्थलमा एक जनाको शव भिरमा अड्किएको अवस्थामा फेला परेको छ। अन्य यात्रुको अवस्था भने अझै खुल्न सकेको छैन। गाडीमा कति जना सवार थिए भन्ने विषयमा आधिकारिक विवरण आउन बाँकी रहेको छ।

दुर्घटनाको जानकारी प्राप्त हुनासाथ नेपाल प्रहरी, सशस्त्र प्रहरी बल तथा स्थानीयवासी घटनास्थलमा पुगेर खोजी तथा उद्धार कार्यमा खटिएका छन्। कठिन भौगोलिक अवस्था र गहिरो भीरका कारण उद्धार कार्य चुनौतीपूर्ण बनेको जनाइएको छ।

दुर्घटनाको कारणबारे अनुसन्धान भइरहेको प्रहरीले जनाएको छ। यात्रुको संख्या, घाइते तथा बेपत्ताको अवस्था सम्बन्धी थप विवरण उद्धार कार्य सम्पन्न भएपछि सार्वजनिक गरिने अपेक्षा गरिएको छ।

कर्णाली प्रदेशमा साँघुरा, जोखिमपूर्ण सडक, कमजोर पूर्वाधार र वर्षेनी दोहोरिने सवारी दुर्घटनाले सर्वसाधारणको ज्यान जाने क्रम रोकिएको छैन। बारम्बार यस्ता दुर्घटना भइरहँदा सडक सुरक्षा, पूर्वाधारको गुणस्तर, नियमित मर्मत तथा प्रभावकारी यातायात व्यवस्थापनप्रति सम्बन्धित निकायको ध्यानाकर्षण हुनुपर्ने आवाज उठ्दै आएको छ।

यस दुर्घटनाले फेरि एकपटक कर्णालीका नागरिकले सुरक्षित यात्राको अधिकार कहिले सुनिश्चित हुन्छ भन्ने गम्भीर प्रश्न खडा गरेको छ। उद्धार तथा अनुसन्धानबाट थप विवरण सार्वजनिक हुने क्रम जारी रहेको छ।