प्रहरीले अब नाकामा किटमार्फत लागुऔषध जाँच गर्ने

प्रहरीले लागुऔषध नियन्त्रण गर्न सीमानाकाहरूमा किटमार्फत शंकास्पद व्यक्तिमा लागुऔषध प्रयोगको अवस्थाबारे परीक्षण गर्ने भएको छ । प्रयोगकर्ताले सीमावर्ती भारतीय बजार पुगी लागुऔषध प्रयोग गर्ने र बोकेरसमेत आउने गरेको पाइएपछि नाकामा ओहोरदोहोर गर्ने शंकास्पद व्यक्तिको नमुना लिएर किटमार्फत परीक्षण गर्न लागिएको हो । 

सुदूरपश्चिममा लागुऔषध प्रयोगको अवस्था भयावह रूपमा फैलिरहेको छ । प्रहरीको तथ्यांकअनुसार गत मंसिरमा मात्र प्रदेशभरि लागुऔषध मुद्दामा ८८ जना पक्राउ परेका छन् । प्रहरीले लागुऔषधसम्बन्धी ५६ वटा मुद्दा दर्ता गरेको छ । प्रहरीले एक महिनामै सुदूरपश्चिमबाट साढे २७ किलो चरेस, सवा एक किलो गाँजा र ११८ ग्राम खैरो हेरोइन बरामद गरेको छ । 

सुदूरपश्चिम प्रदेश प्रहरी प्रमुख प्रहरी नायब महानिरीक्षक ओमबहादुर रानाले लागुऔषध नियन्त्रण गर्न किटमार्फत नाकाहरूमा स्वास्थ्य जाँच गर्ने तयारी भइरहेको बताए । ‘किटको व्यवस्थापनका लागि प्रदेश सरकार र स्थानीय तहहरूसँग समन्वय गरिरहेका छौँ,’ उनले भने, ‘छिट्टै परीक्षण सुरु गर्ने तयारी छ ।’ उनले यहाँ हुने आपराधिक घटनामा कुनै न कुनै रूपमा लागुऔषध जोडिएको पाइने गरेको बताए । 

प्रहरीले चलाउने कारबाहीले मात्र लागुऔषध नियन्त्रण गर्न सम्भव नदेखिएको उल्लेख गर्दै प्रहरी नायब महानिरीक्षक रानाले नागरिकलाई समेत लागुऔषध नियन्त्रणमा जोड्ने गरी कार्यक्रम सञ्चालन गर्न लागिएको बताए । ‘लागुऔषध नियन्त्रण गर्न प्रहरीको ‘काउन्टर’ले मात्र पुगेन । अब प्रहरी र नागरिक मिलेर लागुऔषध नियन्त्रणमा लाग्ने गरी कार्ययोजना बनाएर लागू गर्दै छौँ,’ रानाले भने, ‘लागुऔषध तस्करलाई कारबाही र प्रयोगकर्तालाई व्यवस्थापन गरेर जाने योजना छ ।’ 

प्रहरी तथ्यांकअनुसार सुदूरपश्चिमका कारागारमा रहेका कैदीबन्दीमध्ये २९ प्रतिशत लागुऔषध मुद्दाका छन् । कात्तिकमा मात्र लागुऔषधसम्बन्धी ५२ वटा मुद्दामा ८७ जनालाई पक्राउ गरिएको प्रदेश प्रहरी कार्यालयका प्रवक्ता प्रहरी उपरीक्षक गौतम मिश्रले जानकारी दिए । कात्तिकमा प्रदेशभरिबाट २५६ ग्राम खैरो हेरोइन, पौने तीन किलो चरेस र ६५५ ग्राम गाँजा बरामद गरिएको उनले बताए । प्रहरी उपरीक्षक गौतमका अनुसार पक्राउ पर्नेमध्ये अधिकांश युवा छन् ।

खैरो हेरोइनलगायत लागुऔषध सीमावर्ती भारतीय बजारबाट तस्करी गरेर ल्याउने गरिएको पाइन्छ । भारतसँगको लामो सिमाना जोडिएका कैलाली, कञ्चनपुरमा लागुऔषध प्रयोगको अवस्था भयावह छ । खुला सिमानाका कारण भारतबाट हुने आयातलाई रोक्न चुनौतीपूर्ण रहेको प्रहरी उपरीक्षक गौतमले बताए ।

प्रदेश प्रहरी प्रमुख प्रहरी नायब महानिरीक्षक रानाले जेन–जी आन्दोलनका क्रममा फरार रहेका कैदीबन्दीलाई पक्राउ गर्न प्रहरीले विशेष रूपमा काम गरिरहेको बताए । कतिपय कैदीबन्दी भारत गएको बुझिएको उल्लेख गर्दै उनले फरार कैदीबन्दी नियन्त्रण गर्न भारतीय सुरक्षा अधिकारीसँग पनि समन्वय भइरहेको जानकारी दिए । आन्दोलनका वेला सुदूरपश्चिका विभिन्न कारागारबाट फरार भएका ३६५ जना कैदीबन्दी फर्केका छैनन् ।