११ लाख ऋणबाट उन्मुक्ति लिन दुईजनाको ह,त्या
ललितपुरको महालक्ष्मी नगरपालिका– ८, सेराफाँटमा भएको दुईजनाको हत्याको कारण कृषि फार्म सञ्चालन गर्न लिएको ऋण रहेको खुलेको छ । २४ मंसिरमा सिन्धुलीको गोलान्जोर गाउँपालिका– ५, ताप्केडाँडाका २५ वर्षीय सुनील भनिने केशवराज हायु र त्यसको भोलिपल्ट भोजपुरको अरुण गाउँपालिका– ३ का २१ वर्षीय पारुहाङ राईको हत्या भएको थियो । घटनामा संलग्न रहेको आरोपमा काठमाडौं उपत्यका अपराध अनुसन्धान कार्यालयबाट खटिएको प्रहरीले सिन्धुलीकै सुनकोशी गाउँपालिका– ४, कोटगाउँका २१ वर्षीय देवराज ढुंगेल र २० वर्षीय जयराम अधिकारीलाई पक्राउ गरी अनुसन्धान गर्दा हत्याको रहस्य खुलेको हो ।
ललितपुरको महालक्ष्मी नगरपालिका– ७, चाँगाथली बस्ने ढुंगेल नाताले मृतक हायुका जेठान हुन् । राई भने कृषि फार्म चलाउँथे । ढुंगेलले पनि कृषि फार्म चलाउन भन्दै हायु र राईसँग ११ लाख रुपैयाँ ऋण लिएका थिए । तर, चुक्ता गर्न सकेका थिएनन् । सोही ऋणबाट उन्मुक्ति पाउन उनले दुवैको हत्या गरेको अनुसन्धान कार्यालयका प्रवक्ता काजीकुमार आचार्यले बताए ।
‘ढुंगेलले मृतक हायु र राईसँग कृषि गर्न ११ लाख रुपैयाँ ऋण लिएको देखिन्छ । तर, उनले ऋण तिर्न सकिरहेका थिएनन् । सोही ऋणबाट उन्मुक्ति पाउने उद्देश्यले हायु र राईको हत्या गरेको देखिन्छ,’ उनले भने । प्रहरीका अनुसार अधिकारीलाई ढुंगेलले नै हत्यामा सहभागी गराएका थिए । घटनाअघि उनी गाउँमै थिए । हत्या योजना बनाएपछि उनलाई ढुंगेलले नै महालक्ष्मी नगरपालिका– ८, ज्यामिरेकोटमा बोलाएका थिए । यसका लागि ढुंगेलले अधिकारीलाई गाउँमा लागेको दुई लाख ऋण चुक्ता गरिदिने आश्वासन दिएका थिए । यसैमा लोभिएर अधिकारी हत्यामा संलग्न भएको देखिएको प्रवक्ता आचार्यले बताए ।
‘घटनाको मुख्य योजनाकार ढुंगेल नै रहेको देखिन्छ । उनैले गाउँमा रहेका अधिकारीलाई फोन गरेर ललितपुर बोलाएको देखिन्छ । अधिकारीको गाउँमा दुई लाख ऋण रहेको र त्योबराबर रकम दिने प्रलोभनमा ढुंगेलले उनलाई हत्यामा प्रयोग गरेको देखियो,’ उनले भने ।
प्रहरीका अनुसार ज्यामिरेकोटमा हत्या गरिएका हायुको शव गत २ पुसमा सेराफाँटस्थित सानोकान्छा श्रेष्ठको तरकारी बारीमा रहेको इनारमा फेला परेको थियो । त्यस्तै, राईको शव भक्तपुरको देउराली भञ्ज्याङमा झाडीभित्र भेटिएको थियो । उनको त्यहीँ मृत्यु भएको प्रहरीले जनाएको छ ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।