प्रधानमन्त्रीले अभिव्यक्तिको पुष्ट्याइँ नगरेसम्म संसद चल्न नदिने एमालेको अडान
काठमाडौं । नेकपा (एमाले)ले प्रधानमन्त्री बालेन्द्र साहले नेपाल–भारत सीमासम्बन्धी प्रतिनिधि सभामा दिएको अभिव्यक्तिको पुष्ट्याइँ नगरेसम्म संसद बैठक सञ्चालन हुन नदिने बताएको छ ।
मंगलबार सिंहदरबारस्थित संसद भवन परिसरमा सञ्चारकर्मीसँग कुरा गर्दै एमाले सांसद गुरु बरालले प्रधानमन्त्रीले संसदमा आएर आफ्नो भनाइको तथ्यगत आधार प्रस्तुत गर्नुपर्ने, अन्यथा उक्त अभिव्यक्ति फिर्ता लिनुपर्ने बताएका हुन् ।
उनले प्रधानमन्त्रीको उपस्थितिको अपेक्षामा विपक्षी दलहरू लामो समयसम्म पर्खिएको उल्लेख गर्दै प्रधानमन्त्री अनुपस्थित रहेपछि संसदको अवरोध यथावत् राखिएको बताए ।
‘प्रधानमन्त्रीज्यू संसदमा आएर आफूले दिएको अभिव्यक्तिको या त पुष्ट्याइँ गर्नुपर्छ, होइन भने फिर्ता लिनुपर्छ,’ बरालले भने, ‘आज पनि हामीले उहाँको प्रतीक्षा गर्यौँ, तर उहाँ आउनुभएन । जबसम्म स्पष्ट जवाफ आउँदैन, संसद अगाडि बढ्न दिँदैनौँ ।’
बरालले सभामुखले संसदको कारबाही अघि बढाउने प्रयास गरे पनि विपक्षी दलहरूले आफ्नो अडान कायम राखेको बताए ।
उनले प्रधानमन्त्रीको अभिव्यक्तिका कारण स्वदेश मात्र नभई अन्तर्राष्ट्रिय स्तरमा समेत नेपालको छविमा असर परेको दाबी गरे । भारतमा समेत विभिन्न किसिमका सूचना सार्वजनिक भएको र बेलायतले नेपाल–भारत सीमा विवादमा आफ्नो कुनै भूमिका नरहेको स्पष्ट पारेको प्रसंग उल्लेख गर्दै प्रधानमन्त्रीको भनाइले थप अन्योल सिर्जना गरेको उनको भनाइ थियो ।
बरालले नेपालको हित, प्रतिष्ठा र राष्ट्रिय अडान जोगाउन एमाले प्रतिबद्ध रहेको उल्लेख गर्दै प्रधानमन्त्रीले सदनमा उपस्थित भएर आफ्नो धारणा स्पष्ट नगरेसम्म संसदको अवरोध जारी रहने चेतावनी दिए ।
