नयाँ दिल्लीमा ईसीसीआई भारत र नेपाली दूतावासबीच फलदायी भेटवार्ता
नयाँ दिल्ली, ११ जून । नेपाल र भारतबीचको आर्थिक, व्यापारिक तथा लगानी सम्बन्धलाई थप सुदृढ बनाउने उद्देश्यले एभरेस्ट चेम्बर अफ कमर्स एण्ड इन्डस्ट्रिज (ECCI) भारतको प्रतिनिधिमण्डलले नयाँ दिल्लीस्थित नेपाली दूतावासमा शिष्टाचार भेट गरेको छ।
ईसीसीआई भारतका अध्यक्ष डा. मोहन कार्कीको नेतृत्वमा रहेको प्रतिनिधिमण्डलमा उपाध्यक्ष मनोज कोटाल, उपाध्यक्ष राम नेपाल तथा सल्लाहकार डोलराज भण्डारी सहभागी थिए। प्रतिनिधिमण्डलले दूतावासका उच्च अधिकारीहरूसँग भेटघाट गरी नेपाल–भारतबीच व्यापार, लगानी, पर्यटन, उद्यमशीलता तथा आर्थिक सहकार्यका विविध आयामबारे विस्तृत छलफल गरेको थियो।
भेटवार्ताका क्रममा दुवै देशबीचको ऐतिहासिक, सांस्कृतिक तथा आर्थिक सम्बन्धलाई अझ प्रभावकारी ढंगले अगाडि बढाउन निजी क्षेत्रको भूमिकाबारे विशेष चर्चा भएको थियो। प्रतिनिधिमण्डलले नेपालमा विदेशी लगानी आकर्षित गर्ने, भारतीय लगानीकर्तालाई नेपालका सम्भावनायुक्त क्षेत्रमा लगानी गर्न प्रोत्साहन गर्ने तथा नेपाली उद्यमीहरूलाई भारतीय बजारसँग जोड्ने विषयमा आफ्ना धारणा प्रस्तुत गरेको थियो।
छलफलमा नेपालका पर्यटन, कृषि, जलविद्युत, सूचना प्रविधि, उत्पादनमूलक उद्योग तथा पूर्वाधार विकासका क्षेत्रमा रहेको लगानी सम्भावनाबारे पनि विचार आदान–प्रदान गरिएको थियो। साथै, सीमापार व्यापारलाई सहज बनाउन, व्यवसायीहरूबीच नेटवर्क विस्तार गर्न तथा नयाँ साझेदारीका अवसर सिर्जना गर्न आवश्यक पहलहरूबारे समेत कुराकानी भएको थियो।
प्रतिनिधिमण्डलले नेपाल र भारतबीचको आर्थिक सम्बन्धलाई थप मजबुत बनाउन व्यापारिक मञ्च, लगानी सम्मेलन, उद्यमशीलता प्रवर्द्धन कार्यक्रम तथा व्यवसायिक अन्तरक्रियालाई नियमित रूपमा सञ्चालन गर्नुपर्ने आवश्यकता औंल्याएको थियो। दूतावासका अधिकारीहरूले पनि निजी क्षेत्रको सक्रिय सहभागिताले दुई देशबीचको आर्थिक सहकार्यलाई नयाँ उचाइमा पुर्याउन महत्वपूर्ण योगदान पुग्ने विश्वास व्यक्त गरेका थिए।
भेटका क्रममा दुवै पक्षले नेपाल–भारत सम्बन्धलाई केवल कूटनीतिक तहमा मात्र सीमित नराखी व्यापार, लगानी, पर्यटन र नवप्रवर्तनका क्षेत्रमा समेत थप विस्तार गर्नुपर्नेमा जोड दिएका थिए। साथै, आर्थिक विकास र रोजगारी सिर्जनामा सहयोग पुग्ने गरी दुवै देशका उद्यमी तथा लगानीकर्ताबीच सहकार्य अभिवृद्धि गर्ने विषयमा सकारात्मक प्रतिबद्धता व्यक्त गरिएको थियो।
ईसीसीआई भारतले आगामी दिनमा पनि नेपाल र भारतबीचको आर्थिक साझेदारीलाई थप सुदृढ बनाउन विभिन्न कार्यक्रम तथा पहलमार्फत सक्रिय भूमिका निर्वाह गर्ने जनाएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।