डेराभित्र ढोका बन्द अवस्थामा बझाङकी स्वास्थ्यकर्मी मृत फेला
खोटाङ्, २ असार । खोटाङ जिल्लाको बराहपोखरी गाउँपालिका–१ स्थित स्वास्थ्य चौकीमा कार्यरत २३ वर्षीया स्वास्थ्यकर्मी अनिशाकुमारी धामी आफ्नै डेराको कोठाभित्र मृत अवस्थामा फेला परेकी छन्। बझाङ स्थायी घर भएकी धामी स्थानीय मुना तामाङको घरमा डेरा गरेर बस्दै आएकी थिइन्।
प्रारम्भिक जानकारीअनुसार आइतबार बिहानदेखि उनी कोठाबाट बाहिर ननिस्किएपछि र कुनै प्रतिक्रिया नआएपछि शंका उत्पन्न भएको थियो। लामो समयसम्म ढोका नखुल्दा स्थानीय बासिन्दाले घटनाबारे प्रहरीलाई खबर गरेका थिए। त्यसपछि प्रहरी टोली तत्काल घटनास्थलमा पुगेको थियो।
प्रहरीले कोठाको ढोका भित्रबाट बन्द अवस्थामा रहेको पाएको र आवश्यक प्रक्रिया पूरा गरी ढोका खोलेर हेर्दा उनलाई मृत अवस्थामा फेला पारेको जनाएको छ। घटनास्थलको प्रारम्भिक निरीक्षणपछि प्रहरीले शवलाई कानुनी प्रक्रिया पूरा गर्न पोष्टमार्टमका लागि पठाएको छ।
जिल्ला प्रहरी कार्यालय खोटाङका अनुसार घटनाको वास्तविक कारण अझै स्पष्ट भइसकेको छैन। सम्भावित कारणहरूको अनुसन्धान भइरहेको र सबै कोणबाट घटनाको गहिरो छानबिन जारी रहेको प्रहरीले जनाएको छ।
यस घटनाले स्थानीय क्षेत्रमा शोकको माहोल सिर्जना गरेको छ भने स्वास्थ्य क्षेत्रमा कार्यरत सहकर्मीहरूमा पनि गहिरो दुःख छाएको छ। प्रहरीले सत्यतथ्य पत्ता लगाउन अनुसन्धानलाई तीव्र बनाएको जनाएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।