भारतीय अभिनेता प्रदीप रावतको निधन, नेपाली फिल्म ‘आबाट आमा–२’ को छायांकन हालै सम्पन्न गरेका थिए
काठमाडौं, २० साउन । भारतीय चलचित्र उद्योगका चर्चित अभिनेता प्रदीप रावतको ७४ वर्षको उमेरमा निधन भएको छ। ब्लड क्यान्सरबाट पीडित रावतको उपचारका क्रममा निधन भएको भारतीय सञ्चारमाध्यमहरूले जनाएका छन्।
लामो समयदेखि अभिनय क्षेत्रमा सक्रिय रहेका रावतले टेलिभिजन र चलचित्र दुवै माध्यममा आफ्नो छुट्टै पहिचान बनाएका थिए। विशेषगरी चर्चित टेलिभिजन धारावाहिक ‘महाभारत’ मा उनले निर्वाह गरेको अश्वत्थामाको भूमिका दर्शकमाझ निकै लोकप्रिय बनेको थियो।
बलिउडमा पनि रावतले सशक्त खलपात्रका रूपमा आफूलाई स्थापित गरेका थिए। उनले ‘सरफरोस’, ‘लगान’, ‘गजिनी’ लगायतका चर्चित चलचित्रमा दमदार अभिनय गरेका थिए। उनको गम्भीर व्यक्तित्व, प्रभावशाली संवाद प्रस्तुति र सशक्त अभिनयका कारण उनी भारतीय चलचित्र उद्योगका चर्चित चरित्र अभिनेतामध्ये एक मानिन्थे।
रावतको अभिनय यात्रा भारतमै सीमित थिएन। उनले हालै नेपाली चलचित्र ‘आबाट आमा–२’ को छायांकन पनि सम्पन्न गरेका थिए। उक्त चलचित्रमार्फत उनी नेपाली फिल्म उद्योगमा समेत देखिन लागेका थिए। उनको निधनसँगै चलचित्रको प्रदर्शनअघि नै दर्शकले एक अनुभवी कलाकार गुमाएका छन्।
उनको निधनको खबर सार्वजनिक भएसँगै भारतीय तथा नेपाली चलचित्र क्षेत्रका कलाकार, निर्माता र शुभचिन्तकहरूले सामाजिक सञ्जालमार्फत श्रद्धाञ्जली व्यक्त गरिरहेका छन्। रावतको निधनले भारतीय चलचित्र उद्योगसँगै नेपाली फिल्म क्षेत्रमा पनि शोकको वातावरण सिर्जना भएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।