टीकापुरमा कात्तिक १६ देखि राधाकृष्ण शृङ्गारिक महाआरती महोत्सव संचालन
टीकापुर, १७ कात्तिक ।
कैलालीको टीकापुरमा सामुदायिक ज्येष्ठ नागरिक मिलन केन्द्र तथा सत्संग भवन निर्माणका लागि राधाकृष्ण टीकापुर शृङ्गारिक महाआरती धर्म जागरण सप्ताह महा महोत्सव आयोजना हिजो कार्तिक १६ गतेदेखि आरम्भ भएको छ ।
टीकापुर नगरपालिका–१, ब्लक नम्बर २५ स्थित राधाकृष्ण टोलको पिपल चौतारा प्राङ्गणमा कात्तिक १६ देखि २२ गतेसम्म महोत्सव सञ्चालन हुने आयोजकले जनाएको छ ।
सामुदायिक ज्येष्ठ नागरिक मिलन केन्द्र तथा सत्संग भवन निर्माण गर्ने उद्देश्यले आयोजना गर्न लागिएको महोत्सवमा धार्मिक तथा आध्यात्मिक कार्यक्रम सञ्चालन गरिनेछ ।
महोत्सवले धार्मिक जागरणसँगै सामाजिक सद्भाव, आपसी एकता र ज्येष्ठ नागरिकको सम्मान तथा सेवाको भावना अभिवृद्धि गर्ने अपेक्षा गरिएको छ । साथै, भवन निर्माणका लागि आवश्यक सहयोग जुटाउनसमेत महोत्सवले महत्त्वपूर्ण भूमिका खेल्ने आयोजकको विश्वास छ ।
