एमालेको दावी- कोशी सरकार भत्काउन गठबन्धन लागिसक्यो
काठमाडौं । नेकपा एमालेका महासचिव शंकर पोखरेलले कोशी प्रदेशमा गठबन्धनले सरकार भत्काउने प्रपञ्च थालिसकेको दावी गरेका गरेका छन् । प्रेस चौतारी सिन्धुलीले शनिबार आयोजना गरेको पत्रकार सम्मेलनमा बोल्दै उनले यस्तो आरोप लगाएका हुन् ।
महासचिव पोखरलले कोशीका मुख्यमन्त्री केदार कार्की इमानदार ढंगले अघि बढेसम्म एमालेले साथ दिनेसमेत बताए । ‘अहिलेको गठबन्धन असफल भएको परिप्रेक्षमा कोशीले एउटा उदाहरण दिनुपर्छ भन्ने हाम्रो कुरा हो’ उनले भने, ‘यद्यपि सत्ता गठबन्धन सरकार भत्काउने दाउपेचपूर्ण राजनीतिमा जान खोजेको छ ।’
उनले अहिले कोशीमा जसको जगमा सरकार निर्माण भएको छ, त्यसलाई भत्काउने प्रपञ्च सुरु भइसकेको दावी गर्दै भने, ‘मुख्यमन्त्री जसको जगमा हुनुभएको छ, उहाँले आफ्नो इमान कायम राख्नुहुन्छ भन्ने ठान्छु । उहाँ इमानदारितापूर्वक अगाडि बढेसम्म हाम्रो साथ रहन्छ ।’
महासचिव पोखरेलले कोशीमा सरकारविहीन हुन नदिन कांग्रेस नेतालाई समर्थन गरेको पनि बताए । कांग्रेस नेता शेखर कोइरला समूहका केदार कार्की शनिबार कोशीको मुख्यमन्त्री नियुक्त भएका छन् । उनी एमालेको समर्थनमा मुख्यमन्त्री बनेका हुन् ।
