रवि लामिछानेलाई खाेयाले हान्ने व्यक्ति काे हुन् ?
काठमाडौं । राष्ट्रिय स्वतन्त्र पार्टीका सभापति रवि लामिछानेमाथि खाेया प्रहार गर्ने एक व्यक्तिलाई कास्की प्रहरीले नियन्त्रणमा लिएको छ । प्रहरीले उनकाे परिचय सार्वजनिक गरेकाे छैन ।
लामिछानेले खाेया प्रहार गर्ने व्यक्तिका विषयमा कास्कीका प्रहरी प्रमुख एसपी माेहन थापालाई फाेन गरेर जानकारी लिएका थिए । एसपी थापाका अनुसार पक्राउ पर्ने व्यक्ति लमजुङका बासिन्दा हुन् ।
उनी लमजुङको राइनास नगरपालिका वडा नं. ८ का वडाध्यक्ष कृष्ण रानाभाटका आफन्त भएकाे पत्ता लागेकाे थापाले लामिछानेलाई बताए ।
`श्रीमतीले छाेडेकी हुन् रे । एउटा बच्चा रहेछ । पहिले अटाे ड्राइभर रहेछ । अहिले कुनै काम नगरी आवारा भएर हिँडिरहेकाे छ रे´, उनले सुनाए ।
एसपी थापाका अनुसार केही सञ्चारमाध्यममा आएजस्ताे उनी कुनै सहकारीबाट ठगिएका पीडित होइनन् ।
यसैबीच लामिछानेले नियाेजितरूपमा आफ्नाेविरूद्ध प्रचारवाजी गरिएको भन्दै आक्रोश व्यक्त गरेका छन् । उनले सामाजिक सञ्जालमा स्टाटस लेख्दै कान्तिपुरमा प्रकाशित समाचारप्रति कडा प्रतिक्रिया जनाएका हुन् । खाेया प्रहार गर्नु अगाडि नै समाचार रेडी रहेकाे उनकाे दाबी छ ।
ग्यालेक्सी टिभीसँग आफ्नो हिसाबकिताब पहिल्यै क्लियर गरिसकेकाे पनि रविले बताएका छन्।
सूर्यदर्शन सहकारीबाट एक कराेड लिएकाे फर्जी कागज बनाएर आफूलाई फसाउन खोजिएको उनकाे गुनासाे छ ।
