सुदूरपश्चिममा लागुऔषधको बिगबिगी, एकैदिन ७ जना युवक पक्राउ
धनगढीः सुदूरपश्चिममा लागुऔषधको समस्या विकराल बन्दै गएको छ। लागुऔषध सेवन, कारोबार र ओसारपसारमा संलग्नहरु धमाधम पक्राउ पर्न थालेका छन्।
सबैभन्दा बढी कैलाली र त्यसपछि कञ्चनपुरबाट लागुऔषधमा संलग्नहरु पक्राउ पर्न थालेका छन्। सोमबार कैलालीको घोडाघोडी नगरपालिका–१ सुखड चोकबाट भजनी नगरपालिका–९ डम्पुरका २५ वर्षीय गणेशमान सिंह ३ सय मिलिग्राम लागुऔषधसहित इलाका प्रहरी कार्यालय सुखडको प्रहरी टोलीले नियन्त्रणमा लिएको छ।
त्यस्तै गोदावरी नगरपालिका–७ श्रीपुरका २८ वर्षीय शेरबहादुर चौधरीलाई १ सय ७० मिलिग्राम लागुऔषधसहित इलाका प्रहरी कार्यालय मालाखेतीले पक्राउ गरेको छ। गौरीगंगा नगरपालिका–४ राजीपुरका ३५ वर्षीय सुनिलबहादुर खडायत ५ ग्राम, नगद ७ हजार ३८०, घरमा खानतलासी गर्दा ३९ हजार नेपाली रुपैयाँ र ३७ हजार भारतीय रुपैयाँ समेत बरामद गरिएको प्रहरीले जनाएको छ।
मंगलबार विहान धनगढी उप–महानगरपालिका–४ बसपार्कबाट ३ सय ७० मिलिग्राम लागुऔषधसहित मोरङको पथरी शमशेर नगरपालिका–१ घर भइ हाल धनगढी उपमहानगरपालिका–४ बसपार्क बस्ने ४९ वर्षीय कोरिसिकेश निरौला, चुरे गाउँपालिका–३ घर भई हाल धनगढी उपमहानगरपालिका–४ बसपार्क बस्ने १६ वर्षीय एक किशोर पक्राउ परेका छन्।
त्यस्तै कञ्चनपुरको वेदकोट नगरपालिका–७ कङ्गला पुलबाट बेल्डाडी गाउँपालिका–४ घर भइ हाल वेदकोट नगरपालिका–७ बस्ने २५ वर्षीय रोहित चौधरी र भीमदत्त नगरपालिका–३ का २८ वर्षीय शुवास चौधरीलाई २ दशमलव शून्य ९ ग्राम लागुऔषधसहित प्रदेश प्रहरी कार्यालय लागुऔषध नियन्त्रण ब्युरो महेन्द्रनगर र जिल्ला प्रहरी कार्यालय कञ्चनपुरबाट खटिएको संयुक्त प्रहरी टोलीले नियन्त्रणमा लिएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।