सभामुखमा रास्वपाका डीपी अर्याल निर्विरोध निर्वाचित
काठमाडौं । प्रतिनिधिसभाको सभामुख पदमा डीपी अर्याल निर्विरोध निर्वाचित भएका छन् । यद्यपि, उनको औपचारिक घोषणा भने हुन बाँकी रहेको छ ।
सभामुख पदका लागि आज बिहान ११ बजेदेखि दिउँसो २ बजेसम्म मनोनयन दर्ताको समय तोकिएको थियो । उक्त अवधिमा अर्यालको एकल उम्मेदवारी परेको हो ।
प्रतिनिधिसभा नियमावलीको नियम ७ अनुसार सभामुख पदमा एक मात्र उम्मेदवारी परेमा प्रतिनिधिसभाको बैठकमा प्रस्तावक सदस्यले धारणा राखेपछि अध्यक्षता गर्ने व्यक्तिले उक्त उम्मेदवारलाई निर्विरोध निर्वाचित भएको घोषणा गर्ने प्रावधान छ । सोही अनुसार अर्यालको निर्विरोध निर्वाचनको घोषणा अब बस्ने प्रतिनिधिसभा बैठकमा हुनेछ । बैठक आगामी आइतबारका लागि तय गरिएको छ ।
प्रतिनिधिसभामा सत्तारुढ दल राष्ट्रिय स्वतन्त्र पार्टी (रास्वपा) दुई तिहाइ नजिकको अवस्थामा रहेको छ । स्पष्ट बहुमत भएकै कारण प्रतिपक्षी दलहरूले सभामुख पदमा उम्मेदवारी नदिएको बताइएको छ ।
२७५ सदस्यीय प्रतिनिधिसभामा रास्वपाका १८२ सांसद रहेका छन् भने नेपाली कांग्रेसका ३८, नेकपा एमालेका २५, नेपाली कम्युनिस्ट पार्टीका १७, श्रम संस्कृति पार्टीका ७ र राष्ट्रिय प्रजातन्त्र पार्टी (राप्रपा) का ५ सांसद रहेका छन् ।
सभामुख चयनसँगै अब उपसभामुखको निर्वाचन प्रक्रिया अघि बढ्नेछ । उपसभामुखको निर्वाचन सभामुखले तोकेको मिति र समयमा हुने व्यवस्था छ ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।