मुम्बईमा १५ वर्षीया नेपाली किशोरी मृत फेला, निष्पक्ष छानबिनको माग
२५ असोज, काठमाडौं । भारतको महाराष्ट्र राज्यस्थित मुम्बईको घाटकोपर पूर्व पन्तनगर क्षेत्रमा १५ वर्षीया नेपाली किशोरी विस्ना विक घरभित्र मृत फेला परेकी छन्। घटनाको वास्तविक कारण खुल्न बाँकी रहेकाले निष्पक्ष छानबिन गर्न नेपाली समुदायका प्रतिनिधिहरूले माग गरेका छन्।
कैलालीको गौरीगंगा नगरपालिका–७ घर भएकी विस्ना कक्षा ८ मा अध्ययनरत थिइन्। उनका बुबा जित विक र आमा रम्भा विक रोजगारीका सिलसिलामा मुम्बईको घाटकोपर क्षेत्रमा बस्दै आएका थिए।
प्राप्त जानकारीअनुसार परिवारका सदस्य घरबाहिर गएको समयमा विस्ना बस्दै आएको कोठाभित्र मृत अवस्थामा फेला परेकी थिइन्। उनलाई डोरीमा झुन्डिएको अवस्थामा फेला पारिएको बताइएको छ। घटनाका बेला घरको ढोका खुला रहेको जानकारीसमेत प्राप्त भएको छ। यद्यपि, घटनाको वास्तविक परिस्थिति र मृत्युको कारणबारे आधिकारिक पुष्टि हुन बाँकी छ।
नेपाली समाज भारतका केन्द्रीय सदस्य नीरज परियारका अनुसार घटनाबारे प्रहरी अनुसन्धान भइरहेको छ। पोस्टमार्टम रिपोर्ट आएपछि मृत्युको कारणबारे थप जानकारी प्राप्त हुने अपेक्षा गरिएको उनले बताएका छन्।
किशोरीको असामयिक निधनले परिवार र आफन्त शोकमा परेका छन्। घटनाको परिस्थितिबारे विभिन्न प्रश्न उठिरहेका बेला नेपाली समाजका प्रतिनिधिहरूले निष्पक्ष अनुसन्धान गरी सत्यतथ्य सार्वजनिक गर्न सम्बन्धित निकायसँग माग गरेका छन्।
प्रहरी अनुसन्धान र पोस्टमार्टम रिपोर्टबाट किशोरीको मृत्युको वास्तविक कारण खुल्ने अपेक्षा गरिएको छ। घटनाको संवेदनशीलतालाई ध्यानमा राख्दै सम्बन्धित निकायले गहन अनुसन्धान गरी प्राप्त तथ्य सार्वजनिक गर्नुपर्ने माग गरिएको छ।
