मृत्युको मुखबाट फर्किएका सोनिश: आज ११ वर्षको उमेरमा नयाँ सपना

भक्तपुर, २९ जेठ । २०७२ सालको विनाशकारी भूकम्पले देशभर ठूलो जनधनको क्षति पुर्‍यायो। हजारौं परिवार शोकमा डुबे, धेरैले आफ्ना प्रियजन गुमाए। तर यही विपत्तिका बीच एउटा यस्तो घटना पनि घट्यो, जसले निराशाबीच आशाको किरण जगाएको थियो।

भक्तपुरका ४ महिनाका शिशु सोनिश अवाल घर भत्किँदा भग्नावशेषमुनि पुरिएका थिए। उद्धारकर्मीहरूले लगातार खोजी कार्य जारी राखे पनि समय बित्दै जाँदा उनी जीवित भेटिने सम्भावना निकै कम मानिएको थियो। तर उनका परिवारजनले भने आशा छाडेका थिएनन्।

भूकम्प गएको करिब २२ घण्टापछि भग्नावशेषभित्रबाट आएको सानो आवाजले उद्धार टोलीको ध्यान आकर्षित गर्‍यो। त्यसपछि अत्यन्त सावधानीपूर्वक भग्नावशेष हटाउँदै जाँदा सोनिशलाई जीवित अवस्थामा फेला पारियो। उद्धारका क्रममा एउटा काठको बिमले उनलाई थिचिनबाट जोगाएको पत्ता लागेको थियो।

धुलोले ढाकिएको शरीर भए पनि उनको सास चलिरहेको देखेपछि उद्धारकर्मी, सुरक्षाकर्मी तथा स्थानीयबासी भावुक बनेका थिए। उक्त घटनाले देशभर मात्र होइन, अन्तर्राष्ट्रिय सञ्चारमाध्यमाहरूको समेत ध्यान खिच्यो। त्यसपछि सोनिशलाई विश्वभर “Miracle Baby” अर्थात् ‘चमत्कारी बच्चा’ का रूपमा चिनिन थालियो।

भूकम्पपछिको त्यो अविस्मरणीय घटनालाई अहिले पनि धेरै नेपालीले आशा र जीवनको प्रतीकका रूपमा सम्झन्छन्। समयसँगै सोनिश हुर्कँदै गएका छन् र अहिले ११ वर्षका भइसकेका छन्। उनी स्वस्थ, हँसिला र उज्ज्वल भविष्यका सपना बोकेर अघि बढिरहेका छन्।

बाल्यकालमै जीवन र मृत्युको संघर्ष जितेका सोनिश भविष्यमा नेपाली सेना बनेर देश र नागरिकको सेवा गर्ने सपना देखिरहेका छन्। जसरी नेपाली सेनाले उनको जीवन बचाएको थियो, त्यस्तै अरूको जीवन बचाउने र समाजको सेवा गर्ने उनको चाहना रहेको परिवारले जनाएको छ।