टीकापुरको खक्रोला नाका सहित गौरिफन्टा र गड्डाचौकीमा नाकामा एक्सरे र वाकथ्रु मेसिन जडान गरिने
टीकापुर, ५ असार । भारतसँग सीमा जोडिएका सुदूरपश्चिमका प्रमुख नाकाहरूमा सुरक्षा व्यवस्थालाई थप आधुनिक बनाउने तयारी सुरु भएको छ। प्रदेश सरकारले सीमा निगरानीलाई प्रभावकारी बनाउन कैलालीका खक्रौला र गौरिफन्टा (त्रिनगर) तथा कञ्चनपुरको गड्डाचौकी नाकामा अत्याधुनिक उपकरण जडान गर्ने योजना अघि बढाएको हो।
योजनाअनुसार नाकाहरूमा यात्रु तथा मालसामानको जाँचलाई सहज र भरपर्दो बनाउन एक्सरे मेसिन, वाकथ्रु स्क्यानर र सिसिटिभी क्यामेरा स्थापना गरिनेछ। सुरक्षा निकायले प्रविधिको प्रयोगमार्फत सीमा क्षेत्रमा हुने गतिविधिमाथि थप निगरानी राख्न सक्ने विश्वास गरिएको छ।
यस कार्यक्रमका लागि प्रदेश सरकारको आन्तरिक मामिला तथा कानुन मन्त्रालयले ३८ लाख रुपैयाँ बजेट छुट्याएको जनाएको छ। मन्त्रालयका अधिकारीहरूका अनुसार आधुनिक सुरक्षा उपकरणको प्रयोगले सीमा व्यवस्थापनलाई व्यवस्थित बनाउनुका साथै अवैध ओसारपसार तथा आपराधिक गतिविधि नियन्त्रणमा सहयोग पुग्ने अपेक्षा गरिएको छ।
प्रदेश सरकारले सीमा सुरक्षामा प्रविधिको उपयोग बढाउने दीर्घकालीन रणनीतिअनुसार यो कदम चालिएको बताएको छ। सुरक्षा पूर्वाधारको सुदृढीकरणसँगै नाकाहरूको अनुगमन क्षमता बढ्ने र आवागमन प्रक्रिया थप सुरक्षित तथा पारदर्शी बन्ने विश्वास गरिएको छ।
डिजाइन प्रतिलिपि अधिकार © २०८२ मलिका समाचार
यस विज्ञापन डिजाइनको प्रतिलिपि अधिकार © २०८२ मलिका समाचारद्वारा सुरक्षित छ। नेपालको प्रतिलिपि अधिकार ऐन, २०५९ अनुसार यसको अनाधिकृत पुनरुत्पादन, वितरण, प्रदर्शन वा प्रसारण कडाईका साथ निषेध गरिएको छ।