टोरेसको निर्णायक गोलले स्पेनलाई विश्वकप, मेसीको टोली निराश

न्यु जर्सी। फेरान टोरेसले अतिरिक्त समयमा गरेको एकमात्र निर्णायक गोलको मद्दतमा स्पेनले अर्जेन्टिनालाई १–० ले पराजित गर्दै फिफा विश्वकप २०२६ को उपाधि जितेको छ।

न्यु जर्सीस्थित मेटलाइफ स्टेडियममा सम्पन्न फाइनल निकै प्रतिस्पर्धात्मक बने पनि खेलको निर्णय अतिरिक्त समयको दोस्रो हाफ सुरु भएको केही सेकेन्डमै भएको गोलले गरायो। पेड्रो पोरोको उत्कृष्ट क्रसलाई निको विलियम्सले हेडमार्फत टोरेसको दिशामा मिलाइदिएपछि उनले शक्तिशाली हाफ–भली प्रहार गर्दै स्पेनलाई अग्रता दिलाएका थिए।

स्पेनले खेलभर बल नियन्त्रण र अवसर सिर्जनामा स्पष्ट पकड बनाएको थियो। स्पेनले २० पटक गोलतर्फ प्रहार गर्दा अर्जेन्टिनाले निर्धारित समयमा उल्लेखनीय आक्रमण गर्न सकेन। इन्जुरी समयअघि एन्जो फर्नान्डेज रातो कार्ड खाँदै मैदान बाहिरिएपछि अर्जेन्टिना १० खेलाडीमा सीमित भएको थियो, जसको फाइदा स्पेनले अतिरिक्त समयमा उठायो।

स्पेनका लागि यो दोस्रो विश्वकप उपाधि हो। सन् २०१० मा नेदरल्यान्ड्सविरुद्ध अतिरिक्त समयमै प्राप्त ऐतिहासिक जितपछि १६ वर्ष आठ दिनपछि टोली फेरि विश्व फुटबलको सर्वोच्च शिखरमा पुगेको हो। साथै स्पेनले युरोपियन च्याम्पियनसिपपछि विश्वकप जित्दै लगातार दुई प्रमुख अन्तर्राष्ट्रिय उपाधि जित्ने दुर्लभ उपलब्धिसमेत दोहोर्‍याएको छ।

अर्कोतर्फ, साविक विजेता अर्जेन्टिनाको लगातार दोस्रो विश्वकप जित्ने सपना भने अधुरै रह्यो। ३९ वर्षीय कप्तान लियोनल मेसीले प्रतियोगिताभर आठ गोल र चार असिस्ट गर्दै उत्कृष्ट प्रदर्शन गरे पनि फाइनलमा स्पेनको संगठित रक्षापंक्तिलाई भेद्न सकेनन्।

अर्जेन्टिनाका गोलकिपर एमिलियानो मार्टिनेजले ११ उत्कृष्ट बचाउ गर्दै टोलीलाई लामो समयसम्म खेलमा टिकाइराखे पनि अन्ततः टोरेसको प्रहार रोक्न असफल भए।

यससँगै स्पेनका मुख्य प्रशिक्षक लुइस डे ला फुएन्टे ६५ वर्षको उमेरमा विश्वकप जिताउने सबैभन्दा पाका प्रशिक्षक बनेका छन्।

खेल सकिएलगत्तै केही समय दुवै टोलीका खेलाडीबीच सामान्य धकेलाधकेल भए पनि अवस्था छिट्टै नियन्त्रणमा आएको थियो। त्यसपछि स्पेनका खेलाडीहरूले उपविजेता पदक ग्रहण गर्न जाँदै गरेका अर्जेन्टिनी खेलाडीलाई ‘गार्ड अफ अनर’ दिएर खेलभावनाको उत्कृष्ट उदाहरण प्रस्तुत गरेका थिए।