देउडा न्याउलेका धरोहर जगत थापाको निधन

टीकापुर, ०१ मंसिर

सुदूरपश्चिमको मौलिक लोकसंस्कृति देउडा तथा न्याउले खेलका सक्रिय साधक जगत थापाको निधन भएको छ । अछामको मंगलसेन नगरपालिका–११ जन्मघर भई कैलालीको दुर्गौलीमा बस्दै आएका थापाको ४०–४२ वर्षको उमेरमा निधन भएको हो ।
स्थानीय समाजसेवी बप्पल रावलका अनुसार थापाको हिजो सोमबार दिउँसो सवा १२ बजे निधन भएको हो । उनको आज मंगलबार कैलालीस्थित जगतपुर सामुदायिक वनमा अन्त्येष्टि गरिएको छ ।
थापा देउडा संस्कृतिप्रति गहिरो लगाव राख्ने, मिलनसार र अनुशासित व्यक्तिका रूपमा परिचित थिए । देउडा तथा न्याउले खेलमा उनको सक्रिय सहभागिता रहने गरेको थियो । विशेषगरी मुम्बईको गिरगाउँ चौपाटीमा गणपति विसर्जनका क्रममा आयोजना हुने जात्रामा उनले देउडा खेलेको स्मरण गर्दै देउडा प्रेमीहरूले उनको निधनप्रति दुःख व्यक्त गरेका छन् ।
देउडा खेलका क्रममा अनुशासन, मर्यादा र आत्मीयतालाई विशेष महत्त्व दिने थापाले नेपाली लोकसंस्कृतिको प्रवर्द्धनमा आफ्नो रुचि र सहभागितामार्फत योगदान पुर्याएका थिए । उनीसँग मुम्बईमा भेटघाट र सहकार्य गरेका देउडा प्रेमीहरूले उनलाई सरल, आत्मीय र संस्कृतिप्रेमी व्यक्तिका रूपमा सम्झिएका छन् ।
रावलका अनुसार थापा पछिल्लो समय मधुमेहसम्बन्धी समस्याबाट पीडित थिए । खुट्टामा घाउ देखिएपछि स्वास्थ्य अवस्था जटिल बनेको र क्यान्सरको आशंकासमेत देखिएको बताइएको छ ।
थापाका एक छोरा र दुई छोरी छन् । जेठो छोरा करिब १७–१८ वर्षका छन् भने छोरीहरू क्रमशः १३–१४ र १०–११ वर्षका रहेको बताइएको छ । उनको निधनले परिवार, आफन्त तथा देउडा संस्कृतिसँग आबद्ध समुदायमा शोक छाएको छ ।
एक मिलनसार देउडा प्रेमी तथा लोकसंस्कृतिका साधक थापाको असामयिक निधनप्रति विभिन्न क्षेत्रबाट दुःख व्यक्त गर्दै दिवंगत आत्माको चिरशान्तिको कामना र शोकसन्तप्त परिवारजनमा समवेदना प्रकट गरिएको छ ।

